Урин дулаан цаг эхлэхтэй зэрэгцдэг нэг том ажил бол “Бүтээн байгуулалт”. Нэг талдаа сүржин нэртэй даржин ажил. Энэ зуны хувьд Баян-Өндөр сумын Зэст багийн иргэд бүтээн байгуулалтад бүслэгдээд ёстой нэг дээшээ тэнгэр хол, доошоо газар хатуу гэгч болж байна. Оросын эх орны дайн үеийн, тэр дундаа Сталинградын бүслэлтийн тухай кинонууд дээр гардаг шиг энд тэндгүй ухсан нүх шуудуу, овоолсон шороо Зэст багийн энэ зуны өнгө. Овоолсон шороо, ухсан нүх энэ тэрийг нь харвал Зэст багийн иргэд бүтээн байгуулалттай “байлдаад” байгаа ч юм шиг. Аймаг, орон нутгийн удирдлага зунжингаа Зэст багийн нутагт өрнөсөн бүтээн байгуулалтыг мартсан. Аргагүйн эрхэнд хичээлийн шинэ жил эхлэх болсон учраас наймдугаар сарын сүүлчээр Зэст багийн нутагт өрнөж байгаа бүтээн байгуулалттай газар дээр нь танилцаж ажиллав. Дарга нар ирсэний хүчинд ямар ч байсан зэстчүүд есдүгээр сарын 15-нд халуун устай болох сураг ажиг дуулдсан. Зуны гурван сар, намрын эхэн сард 80 хоног орон гэртээ халуун усгүй амьдрахын зовлонг зэстчүүдийн өмнөөс дарга нарт мэдрүүлэхсэн. Өнөөх бүтээн байгуулалтын дүр зургийг нь ажвал зэрэглээн дундаас бүтэж болоод ч байгаа юм шиг, бүтэхгүй суугаад ч байгаа юм шиг л сүүмэлзсэн. Бүр наагуур сэтгэвэл энэ зуны бүтээн байгуулалт нэгэн хип хоп хамлагийн дуунд гардагчлан

... Бид нар бүгдийг бүтээнэ

    Бид нар бүгдийг сөнөөнө... хэмээдэгтэй агаар нэгэн адил санагдана.

Төв зам дагуух газар шорооны ажил, Холбооны уулзвараас эмнэлэг тийш өгсдөг замын зүүн талын ухсан нүх шуудуу, “Их Мандал” төвийн эргэн тойрон дахь шороон далан, зургаадугаар бага сургуулийн баруун талын зам дагасан ухсан нүх. Энэ бүхэн зэстчүүдэд үнэндээ тээр садаа болж байна. Дарга нарт болохоор бүтээн байгуулалт болж харагдаад. Албан ёсны нэр усаараа бол их гоё хэлнэ. “Хүүхдийн зулай шиг нимгэн болсон газар доогуурх инженерийн шугам сүлжээг сольж байна. Төлөвлөгөөт, болон төлөвлөгөөт бус ажил дээр орон нутгийн хөрөнгө оруулалтын хамтарсан, нийлүүлсэн” ажил ийм байдалд хүргэсэн. Бүтээн байгуулалт хийж болно, иргэд эсэргүүцэхгүй. Харин мэдээллээ иргэдэд нээлттэй ил тод өгмөөр байна. Түүнээс биш Зэст багаас сонгогдсон аймгийн ИТХ-ын 2 төлөөлөгчид цаасан дээр хэвлэж өгвөл ажил хийсэн болж харагдахгүй. Төв зам дагуух бүтээн байгуулалт ногоон байгууламжид жинэхэнэ “алан хядах ажиллагаа” болсон. “Дулааны шугаман дээр тарьсан мод ургадаггүй. Муу байдаг. Дороосоо илжирдэг” гэж нэг дарганцар нь мэдэмхийрээд бүгдийг нь толгой дараалан хөрөөдөж аваад хаячихсан. Эрдэнэт хотын төв зам дагуух зарим ногоон байгууламжийг шороон овоолго болгосон энэхүү Бүтээн байгуулалтын дараа зэстчүүд багийнхаа өнгө төрхийг яаж сэргээж авахав. Ядаж байхад өвөл болж байдаг.

Тэгээд ч бүтээн байгуулалт нэртэй бүтээж, сөнөөж байгаа энэ ажлын ихэнх нь зураг төсвийн хувьд асуудалтай, дөнгөж саяхан экспертизээр орж батлагдаж байгаа дуулдсан. Аймаг, орон нутгаас зөвшөөрөл өгдөг дарга нар нь “Тавин лан”-гийнханыг гуйхаар нь яагаа ч үгүй зам ухах, шороо овоолох, ус хаах зөвшөөрлийг нь өгчихдөг. Зөвшөөрөл авсан гүйцэтгэгч тал нь усаа хаагаад нүхээ ухаж аваад “Бүтээн байгуулалт хийж байна” гээд хөлөө жийгээд суучихна. Сар шахам хугацаанд хил гаалиар захиалгат бараа орж ирнэ гээд хийх ажилгүй байшингийн сүүдэрт чулуу няслаад л суух. Ийм л нэг дүр зурагтай, өнгө төрхтэй бүтээн байгуулалтад бүслэгдсэн зэстчүүдийн өмнө ногоон гэрэл хэзээ асах бол.