БШУЯ-наас 2021-2022 оны хичээлийн жилд  сурагч, багш, эцэг эх, сургуулийн хэрэгцээг тодорхойлж, эргэн холбогдох сэтгэл зүйн орчин бүрдүүлэх зорилтыг тавин ажилласан. Энэ хүрээнд сурагч, багш, эцэг эхчүүдэд сэтгэл зүйн тусламж үйлчилгээ үзүүлэх мэргэшсэн сэтгэл зүйчдийг бэлтгэх санаачилгыг “Тогтвортой хөгжлийн боловсрол-II” төслийн хүрээнд гаргасан юм. Ингээд  нийслэл, хөдөө орон нутгийн  загвар 30 сургуульд өнгөрсөн  хичээлийн жилд боловсролын сэтгэл зүйчийг  туршин хэрэгжүүлсэн билээ. Тодруулбал, 6  аймаг, 2 дүүргийн 30 сургуульд ажиллах  64 мэргэжилтэнг мэргэшсэн “Боловсролын сэтгэл зүйч”-ээр бэлтгэв. 

 “Ногоон хөгжлийн бодлого”-оо баталсан Орхон аймаг орон нутгаас сонгогдсон зургаан аймгийн нэг юм. Ерөнхий боловсролын V, IV, XIV,XV сургууль “Тогтвортой хөгжлийн боловсрол”-ын хөтөлбөрийг хэрэгжүүлэх загвар сургуулиар сонгогдож, эдгээр сургуулиудад боловсролын сэтгэл зүйч ажиллаж эхэлсэн билээ. 
     Тэд  “Боловсролын сэтгэл судлал”-ын 12 багц цагийн сургалтыг Монголын сэтгэл зүйчдийн нийгэмлэгийн мэргэжлийн сургагч багш, салбарын эрдэмтэн судлаач, багш нараар нийт 50 хоног заалгаж, боловсролын сэтгэл зүйчээр мэргэшсэн. Үүнээс хойш шат дараатайгаар 11 сургууль боловсролын сэтгэл зүйчтэйгээр 2022 оны хичээлийн жилээ дуусгасан. Энэ хичээлийн жил аймгийн 23 ерөнхий боловсролын сургуулийн 18 нь буюу 80 хувь нь  боловсролын сэтгэл зүйчтэй болж хичээлийн шинэ жилээ эхлүүлээд байна. 
Харин ерөнхий боловсролын Ирээдүйн-Одод, VII сургууль сэтгэл зүйчээр ажиллах  боловсон хүчнээ хайж байна.

СУРГУУЛИЙНХАА  СЭТГЭЛ ЗҮЙЧИЙН ӨРӨӨ РҮҮ ОРООД ГАРАХ НЬ ХЭВИЙН ҮЗЭГДЭЛ ГЭДГИЙГ СУРАГЧИД ХЭДИЙН ОЙЛГОЖЭЭ

Ерөнхий боловсролын сургуулийн сурагчид нууцыг нь чандлан хадгалдаг, сэтгэл засалчтай болсон хоёр дахь хичээлийн шинэ жилээ эхлүүлэв.  Өнгөрсөн жилийн яг өдийд боловсролын сэтгэл зүйчид хийх ажлаа  таниулахыг хичээж байсан бол өнөөдөр тэднийг хамгийн итгэлт, дотны хүн гэдгийг  сурагчид хүлээн зөвшөөрчээ. 
...Боловсролын сэтгэл зүйч сурагч хоёрын уулзалт хамгийн эхлээд нууцлалын гэрээ гэх цаасан дээр хоёул гарын үсэг зурснаар эхэлдэг. Энэ мөчөөс сурагч “энэ хүн миний нууцыг өөр хэн нэгэнд ярихгүй, надад туслах, итгэж  болох хүн” гэдэгт итгэж өөрт тулгамдаад буй бэрхшээлээ ярьж эхэлнэ...