“Унага” цэцэрлэгт үүсэн асуудал удаашрах төлөвтэй байна
Хотын амьдрал 5 сарын өмнө     232    0

“Унага” цэцэрлэгийн хүүхдүүд ангидаа даарч байгаа тухай аймаг даяараа шуугиад багагүй хугацаа өнгөрлөө. Аймаг, орон нутгийн удирдлагуудаас мэргэжлийн байгууллагуудад хандан аралтай арга хэмжээ авах үүрэг өгсөн. Гэвч өнөөдрийг хүртэл “Унага” цэцэрлэгийн байдал  дээрдээгүй асуудал шийдэгдээгүй л байна. Цэцэрлэгийн цонх, хананаас дулаан ихээр алдаж хана хүйтэн байснаас гадна ангиудын дулаан 9-16 хэмд хүрч хүүхэд гэлтгүй багш ажилчдын тохь тух ч алдагдсан байна.

Барилгын дотор дулаан нэмэх 22 хэмтэй байх ёстой. Энэ цэцэрлэгт 19 багийн 346 хүүхэд есөн сарын 1-нд бүртгүүлж байсан ч одоо  200 хүрэхтэй үгүйтэй болтлоо  буурсныг цэцэрлэгийн эрхлэгч танилцуулж байсан. Анги танхим хүйтэн байсан учраас хүүхдүүд ханиад тусч өвчлөл нэмэгдсэн байна.

“Эрдэнэт ус ДТС” компанийн мэргэжилтнүүд “Цэцэрлэгийн шугамын холболт буруу, барилгын дулаан алдалт их байгаа учраас тасалгааны дулаан хэвийн хэмжээнд хүрэхгүй байна” гэж дүгнэсэн аж.

“Унага” цэцэрлэг тойрсон асуудал аймгийн Засаг даргын даваа гарагийн шуурхай  зөвлөгөөн дээр яригдлаа. Энэ үеэр Боловсрол, соёл урлагийн газраас “Унага цэцэрлэг 2015 онд ашиглалтад  орсон.  Тус цэцэрлэгт хүүхдүүдийг харьяалал харгалзахгүй бүртгэсэн. Засвар үйлчилгээний ажил хийвэл хүүхдүүдийг тараан байршуулах судалгааг хийж байгаа” талаар ярилаа.  Хот байгуулалт барилга захиалагчийн албанаас “Хотын захирагчийн алба, Эрдэнэт Ус дулаан түгээх сүлжээ компаниас ажлыг хэсэг гарсан.  Гүйцэтгэгч компанийн дутуу хийсэн ажлыг хийлгэхээр болсон”  гэж мэдээлэв. Эндээс харвал “Унага” цэцэрлэгийн барилга, барилгын дулаантай холбоотой асуудал “Комисс ажиллаж байна, тараан байршуулах судалгаа хийж байна” хэмээх тайлбараас харвал удаашрах төлөвтэй болжээ. Дарга нарын суудаг өрөө тасалгааны дулаан алдагдаж эхэлвэл бушуухан гэгч нь вакум цонхоо солихоос эхлээд дор нь арга хэмжээ авдаг. Харин хүүхдийн цэцэрлэгийн асуудлыг сар гаруй хугацаанд судалсны дараа л шийдэх юм байна. Эндээс харвал манай аймагт “Унага” цэцэрлэгийн хүүхдүүдийн эрх ашиг ноцтой зөрчигдөж байгаад дарга нар төдийлөн санаа зовохгүй, судалсаар байгаа нь гайхашрал төрүүлж байна.

 “Унага” цэцэрлэг нь 2015 оны арваннэгдүгээр сард ашиглалтад орж байсан. Тус цэцэрлэгийн барилгыг 1995 онд барьжээ. “Шугам хоолойн ашиглалтын хугацаа дууссан” гэсэн дүгнэлтийг аймгийн Мэргэжлийн хяналтын газраас гаргажээ. “Унага” цэцэрлэг “Эрдэнэтийн дулааны цахилгаан станц”-аас дулаанаа авч байсан. Хоёр жилийн өмнөөс “Эрдэнэт ус дулаан түгээх сүлжээ” компанийн хоёрдугаар контор дэд станцаас тэжээгдэх болжээ.

 

Сэтгэгдэл бичих

500 тэмдэгт

АНХААРУУЛГА: Уншигчдын бичсэн сэтгэгдэлд ErdenetNews.mn хариуцлага хүлээхгүй болно.
Зочдын сэтгэгдэл (0)