Ц.Баяржаргал: Үхэр, адууны цул махны үнэ 2000 төгрөгөөр өссөн байна
Мэдээ мэдээлэл 3 сарын өмнө     181    0

Аймгийн Онцгой комисс өдөр бүр хэвлэлийнхэнд мэдээлэл хийж байгаа. Энэ удаад хүнсний бүтээгдэхүүний хангалт, бараа бүтээгдэхүүний зохиомол хомсдолын талаар хийсэн шалгалтын тухай мэдээллийг аймгийн ЗДТГ-ын Хөрөнгө оруулалт, хөгжлийн бодлого, төлөвлөлтийн хэлтсийн дарга Ц.Баяржаргал өгсөн юм.

  “ Долоо хоног болгон хүнсний гол нэрийн бараа бүтээглэхүүний үнийн өсөлт, түүний хангамжийн асуудал дээр  тогтмол судалгаа хийн ажиллаж байгаа. Ажлын хэсэг 11 хүний бүрэлдэхүүнтэй. Аймгийн холбогдох мэргэжлийн бүх байгууллагаас төлөөлөл орсон. Гуравдугаар сарын 11-ий өдөр ажлын хэсэг бөөний болон жижиглэнгийн худалдаа эрхэлдэг гол гол худалдааны төвүүд дээр гурван хэсэгт хуваагдаж ажилласан. Хүнсний 33 нэр төрлийн бүтээгдэхүүний үнийн харьцуулалт судалгааг хийсэн. Нийт  33 нэр төрлийн бүтээгдэхүүнээс өчигдрийн байдлаар 12 нэр төрлийн бүтээгдэхүүний үнэ  өмнөх 7 хоногоос өссөн гэсэн  мэдээ гарч байна. Бүтээгдэхүүний үнэ бол ерөнхийдөө 250-иас дээд тал нь 2000 төгрөгөөр өссөн. Үүнд, үхрийн ястай махны жижиглэнгийн үнэ 1000 төгрөгөөр, үхрийн цул мах 2000 төгрөгөөр, хонины мах бөөний үнэ  цул мах нь 500 төгрөгөөр, адууны махны бөөний үнэ 2000 төгрөгөөр, жижиглэнгийн үнэ 700-1500 төгрөгөөр, адууны цул мах 2000 төгрөгөөр, цагаан будааны бөөний үнэ 300 төгрөгөөр, жижиглэнгийн үнэ 400 төгрөгөөр, төмс лууван 250 төгрөгөөр, манжин 1000 төгрөгөөр, байцаа 700-1200 төгрөгөөр, амтат чинжүү 500 төгрөгөөр тус тус өссөн байна. Бусад бүтээгдэхүүний хувьд бол өсөлтгүй тогтвортой байна.  Хүнсний худалдааны дэлгүүрүүд дээр ажиглагдсан зүйл нь гуравдугаар сарын 10 ны өдөр иргэд хэвийн үеэсээ 4-5 дахин олноор, их хэмжээгээр бараа бүтээгдэхүүн худалдаж авсан.  Худалдан авсан дүн мэдээлэл нь байна. Энэ нь жижиглэнгийн барааны өсөлтөнд тодорхой хэмжээгээр нөлөөлсөн гэдгийг худалдаа эрхлэгчид хэлж байна. Өчигдрийн байдлаар хүмүүсийн худалдан авах эрэлт үндсэндээ хэвийн хэмжээнд очсон. Худалдан авалт хийж байгаа хүмүүсийн тоо харьцангуй бага байлаа. Төв цэгүүд дээрх бараа бүтээгдэхүүний үнийг аваад үзэхэд бөөний нийлүүлэлтүүд тогтвортой байсан. Бусад бөөний бараа бүтээгдэхүүний үнэ өсөөгүй. Өөрөөр хэлбэл, жижиглэнгээр бараа бүтээгдэхүүн худалддаг манай худалдаачид бөөний үнээр авсан бүтээгдэхүүнээ үнэ нэмэгдүүлж зарсан нь тогтоогдож байна гэсэн үг. Бараа бүтээгдэхүүний үнийг хэрэглэгчдэд ил тод харагдахуйцаар тавиагүй зөрчил нийтлэг байлаа. Энэ нь жижиглэнгийн үнийг нэмж зарах үндэслэл болж байна гэж Ажлын хэсэг үзсэн. Энэ нь “Хэрэглэгчийн эрх ашгийг хамгаалах тухай хууль”-ийн 7.1-д “...хэрэглэгч барааны талаар үнэн зөв сонголт хийхэд туслах бодит мэдээлээр хангагдах эртэй байна”.  Мөн хуулийн 12.8-д “үйлдвэрлэгч, худалдагч, гүйцэтгэгчээс хэрэглэгчид бараа, ажил үйлчилгээний талаар худал мэдээлэл өгөхийг хориглоно” гэсэн заалтуудыг зөрчиж байна гэж ажлын хэсэг үзсэн.  Үүний дагуу “Хүлэг” хүнсний зах, “Цах” худалдааны төв, “Есөн-Эрдэнэ” худалдааны төвүүдэд Мэргэжлийн хяналтын газраас албан ёсны хуулийн заалтуудыг зөрчсөн зөрчил дээр тодорхой арга хэмжээ авах асуудлыг шийдвэрлүүлнэ.