Энэ цаг мөчид хавтгайруулсан халамжийг биш хөдөлмөр, хөдөлмөрийн үнэ цэнэ, тогтмол орлого, тогтмол ажлын байрыг чухалчилж байгаа. Цаг үетэйгээ хөл нийлүүлсэн, бусдад ч сайн сайхан үлгэр дууриалал болсон нэгэн арга хэмжээ саяхан Баян-Өндөр сумын Эрдэнэ багт болж өнгөрлөө. Тус багийн Ажлын албанаас 4 дэх жилдээ “Өргөө цагаан гэр” тусламжийн аяныг өрнүүлсэн байна. Ингэхдээ Эрдэнэ багийн хэмжээнд хүнс, тэжээлийн дэмжлэгт хамрагддаг айл өрх, сайн дураараа намрын ногоо хураалтад ажилласан олон  иргэд эрдэнэчүүдийнхээ дундаас дахин хоёр ч иргэнийг өргөө цагаан гэртэй болгожээ.

Тэд намрын ногоо хураалтад ажиллаж олсон орлогоосоо харж хандах хамаатан садангүй Эрдэнэ багийн 22 настай иргэнд гэр бэлэглэжээ. Үүгээр ч тогтохгүй тухайн иргэнээ ажил, мэргэжлийн чиг баримжаа олгох сургалтад хамруулж өөрийн гэсэн орлогын эх үүсвэртэй болгосон байна.

Мөн Эрдэнэ багт 4 дэх жилдээ хэсгийн  ахлагчаар ажиллаж байгаа, 4 хүүхэдтэй, өрх толгойлсон  иргэнд өргөө цагаан гэр бэлэглэж нэг өрхийн 5 халуун ам бүлийг баярлуулсан юм. Эрдэнэ багийн Ажлын албаныхан өнгөрсөн 4 жилийн хугацаанд бусдын гар харалгүй өөрсдөө санаачилж, хөдөлмөрлөж олсон орлогоороо 6 өрхийг гэр оронтой болгожээ. Тэдний дараагийн зорилго нь “Өргөө цагаан гэр” аянаа улам өргөжүүлж гэрээс гадна хашаатай болгох явдал гэнэ.