Аймгийн хэмжээнд зохион байгуулж буй “Соёлыг түгээе” сарын аяны хүрээнд Баян-Өндөр сумын Баянцагаан багийн Ажлын алба, тус багийн Соёлын төв хамтран “Эмч, сувилагч таньдаа баярллаа” талархлын арга хэмжээг  зохион байгуулав. Баянцагаан багийн иргэдэд эрүүл мэндийн үйлчилгээг түргэн шуурхай хүргэдэг “Мөнхсүндрэл” ӨЭМТ-ийн эмч, сувилагч нартаа зориулж Соёлын төвийн уран бүтээлчид ая дууныхаа дээжийг өргөн барьж сэтгэлийн цацал өргөлөө.

Уг арга хэмжээнд Баян-Өндөр сумын Засаг дарга Б.Баасансүрэн, Баянцагаан багийн Засаг дарга Г.Наранжав, Баянцагаан багийн Соёлын төвийн хамт олон оролцлоо. Арга хэмжээний үеэр сум, багийн удирдлагууд “Мөнхсүндрэл” ӨЭМТ-ийн эмч, сувилагч нарт талархал илэрхийлж, цэцгийн баглаа бэлэглэсэн юм. “Мөнхсүндрэл” ӨЭМТ-ийн дарга Б.Жаргалсайхан “Бид цар тахлын 2 жилийн хугацаанд ард иргэдийнхээ эрүүл мэндийн төлөө өргөсөн тангарагтаа үнэнчээр, цаг наргүй ажиллаж ирсэн ч эмч, сувилагчийн алдарыг мартсан байна. Ийм сайхан дуу, хуур сонсоогүй уджээ. Бидэнд үнэхээр гэнэтийн бэлэг байлаа. Бидэнд энэ сайхан зүйлсийг мэдрүүлж, урам хайрласан Баянцагаан багийн Соёлын төв болон багийн Ажлын албаныхандаа маш баярлаж байна” хэмээсэн юм.