Аймгийн Засаг даргын Зөвлөлийн ээлжит V хуралдаанаар “Авлигатай тэмцэх үндэсний хөтөлбөр”-ийн хэрэгжилтийн талаарх мэдээллийг сонслоо. УИХ-ын 2016 оны 51 дүгээр тогтоолоор батлагдсан “Авлигатай тэмцэх үндэсний хөтөлбөр”, Засгийн газрын 2017 оны 114 дүгээр тогтоолоор батлагдсан “Авлигатай тэмцэх үндэсний хөтөлбөрийг хэрэгжүүлэх арга хэмжээний төлөвлөгөө”-ний аймгийн Засаг дарга болон төрийн бүх шатны байгууллагын үйл ажиллагаанд хамаарах заалтуудын 2021 оны хэрэгжилтийн талаар аймгийн ЗДТГ-ын Хууль, эрх зүйн хэлтсийн дарга М.Мөнхбаяр танилцуулсан юм. Үндэсний хөтөлбөрийн хүрээнд 11 зорилтыг дэвшүүлж, тэдгээрийг хангах хүрээнд 83 үйл ажиллагааг төлөвлөн 2016-2023 он хүртэл 2 үе шаттай хэрэгжүүлж байгаа. Харин аймгийн Засаг дарга, төрийн бүх шатны байгууллагын үйл ажиллагаанд хэрэгжүүлэх 6 зорилтын хүрээнд 25 арга хэмжээ төлөвлөсөн байна. Аймгийн хэмжээнд жил бүр Авлигын эсрэг хууль тогтоомж болон Авлигатай тэмцэх Үндэсний хөтөлбөрийг хэрэгжүүлэх ажлын төлөвлөгөөг гарган аймгийн Засаг даргаар батлуулан төрийн болон орон нутгийн өмчит байгууллагуудад хүргүүлэн хэрэгжилтийн тайланг жил бүрийн 11 дүгээр сард нэгтгэн гаргаж Авлигатай тэмцэх газарт хүргүүлсэн ажээ.

Аймгийн Засаг даргын дэргэдэх 22 агентлаг болон 2 сумын ЗДТГ-ын үйл ажиллагаанд хяналт шинжилгээ, үнэлгээ хийх ажлыг зохион байгуулж, Засаг даргын зөвлөлийн хурлаар хэлэлцүүлж,  эхний байр эзэлсэн байгууллагуудыг урамшуулах, зөвлөмж хүргүүлэх олон нийтэд мэдээлэх ажлыг зохион байгуулсан байна.

Аймгийн хэмжээнд дэвшүүлсэн 6 зорилт нэг бүрийн хэрэгжилтийг гарган дүгнэхэд манай аймгийн хувьд хөтөлбөрийн хэрэгжилт 95.6 хувьтай гарчээ. Засаг даргын зөвлөлийн гишүүд хэлэлцэж буй асуудалтай холбоотой асуулт асууж хариулт авав. Тухайлбал, Зөвлөлийн гишүүн н.Цэрэнсодном

-Манай аймгийн хувьд төрийн албан хаагчийг хууль бусаар ажлаас чөлөөлсний улмаас улсад учирсан хохирол гэж байна уу?  

-М.Мөнхбаяр: Төрийн албан хаагчийг хууль бусаар чөлөөлсөнтэй холбоотой 4 хүн байгаа. Нөхөн төлбөр буюу улсад учирсан хохирол болох 16 сая 940  мянган төгрөгийн асуудлаар оны өмнө Прокурорын байгууллагаас албан бичиг ирсэн.