Монгол улсын Засгийн газраас 2022 оны бүтээн байгуулалтын ажлыг эрт эхлүүлэхийн тулд тендэр шалгаруулалтыг оны эхний нэгдүгээр улирал буюу гуравдугаар сарын 1-ний дотор дуусгасан байх ёстой хэмээн үзэж байгаа. ”Шинэ сэргэлтийн бодлогын хэрэгжилтийг орон нутагт эрчимжүүлэх нь” нэгдсэн зөвлөгөөн энэ өдрүүдэд Засгийн газрын ордонд болж байна. Зөвлөгөөний үеэр 2022 оны тендэр шалгаруулалтын явцын талаарх мэдээллийг Худалдан авах ажиллагааны албанаас мэдээлжээ. Мэдээллээс харвал Худалдан авалтын ажиллагаа буюу тендэр шалгаруулалтыг эхлүүлсэн хувиар манай аймгийн ОНӨГ-ын худалдан авалтын ажил 100 хувьтай үнэлэгдэж улсад тэргүүлжээ. Харин улсын хэмжээнд Дунговь аймаг 17 хувьтай үнэлэгдэж сүүл мушгисан байна.

2022 онд улсын хэмжээнд хэрэгжих 716 төсөл, арга хэмжээнээс 345-ыг нь зарлаж ажлын явц 48 хувийн гүйцэтгэлтэй байгааг мэдээлэлд онцолсон байна. ”Шинэ сэргэлтийн бодлогын хэрэгжилтийг орон нутагт эрчимжүүлэх нь” зөвлөгөөнд Монгол улсын Ерөнхий сайд Л.Оюун-Эрдэнэ оролцож “Тендэрийг товлосон хугацаанд зохион байгуулж, бүтээн байгуулалт эхлүүлээгүй аймгийн Засаг дарга нарт хариуцлага тооцно” хэмээн мэдэгджээ.

Манай аймгийн хувьд 2022 оны Худалдан авах ажиллагааны төлөвлөгөөнд 70.7 тэрбум төгрөгийн 163 төрлийн бараа, ажил, үйлчилгээ худалдан авахаар төлөвлөөд 70 гаруй тендэр зарлаад байгаа ажээ.