Баянцагаан багийн нутаг, Хуучнаар Хүнсний үйлдвэрийн хашааг түрээслэн лотки, кольцо, бродюр, хавтан үйлдвэрлэдэг “Зэвт цамхаг” компанийн захирал Б.Даринчулуун тэднийг гээд ирсэн худалдан авагчдад дээрх үгийг нүүр бардам хэлж байна. УИХ-ын гишүүн Н.Алтанхуягийн зүгээс Эрдэнэтийн үйлдвэрлэгчидтэй хамтдаа уулзах саналыг “Эрдэнэт үйлдвэр” ХХК-ийн Ерөнхий захирал Х.Бадамсүрэнд тавьсан. Үйлдвэрлэгчдэд ч энэ талаараа дуулгаж хамтран ажиллахыг уриалсан.  Үүний дагуу  УИХ-ын  гишүүн Н.Алтанхуяг, Д.Батлут, “Эрдэнэт үйлдвэр” ТАҮГ-ын Ерөнхий захирал Х.Бадамсүрэн тэргүүтэй Ажлын хэсгийнхэн Б.Даринчулуун захиралтай “Зэвт цамхаг” компанийн үйлдвэрлэлтэй танилцлаа.

Орхон аймаг, Эрдэнэт хотод 2021 он хийгээд энэ жил хийгдэх бүтээн байгуулалт, тохижилтын ажилд яах аргагүй явган хүний замын хавтан, бродюр, кольцо хамгийн их шаардлагатай. Эл компанийн хашаанд хураасан кольцооноос захиалагч нь ачилтаа хийж ажил ид өрнөж байхтай зэрэгцэн Ажлын хэсгийнхэн ч дээрх энэ үйлдвэрийн хийсэн бүтээгдэхүүнтэй нь танилцав.

УИХ-ын гишүүн Н.Алтанхуяг “Та бүхэн энэ бродюрыг хар даа. Арай л өөр байх шиг. Хотынхон байс гээд л бродюр сольдог ажилтай болсон. Танайх үүндээ ямар баталгаа өгөх вэ. За тэр эко хавтанг нь хараарай. Энэ их зүгээр байдаг юм шүү. Би хүртэл өнгөрөгч зун машины зогсоол хийхдээ ийм хавтан ашигласан. Голын нүхнүүдэд нь хар шороо хийгээд ногоо тарьж болдог гээд ашигтай эд. За энэ яахав. Би танайхыг рекламдчихав уу даа. Х.Бадамсүрэн захирал ч энд байна. Баталгааны хувьд юу гэх вэ” хэмээлээ.

Компанийн захирал Б.Даринчулуун “Манай бродюр 8 жилийн баталгаатай. Бизнес хийхэд тухайн бүтээгдэхүүнийг хийсэн буух эзэн буцах хаяг байх хэрэгтэй. Би Эрдэнэтийн иргэн. Ам бардам хэлэхэд манайх баталгаатай, үгүй гэвэл та буцаагаад аваад ирээрэй” хэмээсэн юм.

УИХ-ын гишүүн Д.Батлут “Энэ жил аймгийн хэмжээнд 1-4 дүгээр бичил хорооллын тохижилтын ажилд илүү анхаарч байгаа. Багагүй хөрөнгө мөнгө ч туссан. Энэ компанийн бүтээгдэхүүнээс харвал Эрдэнэтэд нэн шаардлагатай бетон хийцүүд байна. Ийм баталгаа амлалт өгч байгаа нь үнэхээр сайн хэрэг” хэмээн магтаад авсан. “Компанийн хувьд банкны урт богино хугацааны зээлд хамрагдахад хүндрэл их байдаг. УИХ-ын гишүүн Н.Алтанхуяг, Д.Батлут, Эрдэнэт үйлдвэрийн захирал Х.Бадамсүрэн нар ирж үйлдвэрлэлтэй танилцсанд баяртай байна. Явган хүний хальтардаггүй хавтан, кольцо гээд бүтээгдэхүүнүүд маань хаана ч гологдохгүй” хэмээн Б.Даринчулуун бүтээгдэхүүнээ танилцуулсан юм.