Ардчиллын асуудал бол нэг намын дотоод асуудал биш юм. Энэ бол ардчилсан Монголын ирээдүйн тухай ярьж байна гэж АН-ын даргын сонгуульд өрсөлдөж байгаа нэр дэвшигч Х.Баттулга хэлж байна. АН-ын даргын төлөө сунгаанд УИХ-ын гишүүн Ж.Батсуурь, Монгол Улсын 5 дахь Ерөнхийлөгч асан Х.Баттулга нар өрсөлдөж, аймгуудаар тойрч, намын гишүүд дэмжигчидтэйгээ уулзаж байгаа. Энэ удаад Орхон аймагт ирж, Уурхайчин соёлын ордонд иргэд дэмжигчдийн төлөөлөлтэй уулзсан юм.

АН-ын гишүүд дэмжигчид намын даргын сонгууьд өрсөлдөгч нэр дэвшигчдээ халуун дотноор хүлээн авлаа.

Нэр дэвшигч Х.Баттулга “Миний бие хоёр удаа Засгийн газарт ажиллалаа, нэг удаа Ерөнхийлөгчөөр ажиллалаа. Одоо АН-д өрөө төлөх цаг болсон гэж бодоод энэ удаа намын даргын сонгуульд өрсөлдөхөөр шийдсэн гэж ярьж байна. Нэр дэвшигч Ж.Батсуурь АН-ын дотоод тэмцэл, тамга тэмдгийн асуудал энэ намыг гишүүд дэмжигчгүй болгоход хүрлээ. Бид одоо л эвтэй байж, намаа олон фракцийн эрх ашгаас  аврах цаг болсон гэж ярьж байна.

Иргэд, намын гишүүд дэмжигчид урт дараалал үүсгэж, нэр дэвшигчдэд санал бодлоо хэлж, сонгуулийн ажилд нь амжилт хүслээ.

Иргэдийн асуултанд нэр дэвшигчид хариулт өглөө. Өөрийн оршин суугаа нутаг орны тулгамдсан асуудлаас илүү улс эх орны хөгжил, ирээдүйн хөгжлийн төлөө илүү олон асуултыг нэр дэвшигчдэд тавьж байлаа.

32 жилийн түүхтэй намынхаа эв нэгдлийг эрхэмлэж, нэг тугийн дор зангидах хариуцлагатай цаг үе ирээд байна. Бид, АН 2024 онд ялалт байгуулна. Үүний тулд УИХ-ын сонгуульд нэр дэвшигчдийг орон нутгийн намын байгууллагаас тодруулж, нэр дэвшигчид маань тойрог бүр дээрээ ажиллаж эхэлнэ. Намын тамга тэмдгийн асуудлыг шийдвэрлэж, намын эв нэгдлийг дээдэлж, хүчтэй ажиллах болно гэж нэр дэвшигч Х.Баттулга намын гишүүд дэмжигчиддээ амлалт өгч байсан юм.