Баян-Өндөр сумын Цагаанчулуут багийг дахин 3 хувааж Найрамдал, Чандмань баг байгуулна. Дээр нь Эрдэнэ багийг 2 хуваан нэмж Чингэл баг, Яргуйтыг мөн хувааж Баян-Овоо багийг шинээр байгуулахаар аймгийн ИТХ-ын ээлжит наймдугаар хуралдаанаас шийдвэрлэлээ.

Төрийн үйлчилгээг иргэдэд тэгш хүртээмжтэй, чирэгдэлгүй хүргэх үүднээс хүн ам ихтэй дээрх багуудыг хувааж шинээр 4 баг нэмж байгуулах саналыг Баян-Өндөр сумын ЗДТГ, мөн сумын ИТХ-аас гаргасны дагуу аймгийн ИТХ-ын хуралдаанаар хэлэлцэн 2023 оны нэгдүгээр сарын 1-нээс хэрэгжүүлэхээр тогтов.  Ингэхийн тулд энэ оны 11 дүгээр сард дээрх багийн Иргэдийн нийтийн хурлыг зохион байгуулж, багийн Засаг даргыг сонгох юм. Дөрвөн ч багийг шинээр байгуулахын тулд 650 гаруй сая төгрөгийн төсөв шаардагдаж байгаа. Үүнийг энэ оны төсөвт суулгасан байна. Харин 2023 оноос багийн ажлын албан хаагчдын цалин хөлсний асуудлыг ирэх жилийн улсын төсөвт суулгахаар болжээ.

Цагаанчулуут багийг 1994 онд байгуулсан аж. Өнөөдрийн байдлаар тус багт 2012 өрхийн 7220 хүн амьдардаг. Газар нутгийн хэмжээ нь 171 га талбай. Чех улсын хөрөнгө оруулалтаар баригдаж байгаа 7А хорооллын айл өрхийг, 49-53 дугаар гудамжны айл өрхийг нэгтгэн Найрамдал баг болгож байна. Харин ТОСК болон Залуучуудын ордны орчмын газар нутгийг хамруулан Чандмань баг байгуулахаар боллоо.

Эрдэнэ багийг аймгийн ИТХ-ын тогтоолоор 2007 онд байгуулсан. Өнөөдөр тус багт 2036 өрхийн 7400 хүн амьдардаг. Тус багийг хоёр хувааж нэмж Чингэл баг байгуулна. Шинээр байгуулагдах Чингэл багт 648 өрх хамрагдах гэнэ.

Харин өнөөдөр болсон аймгийн ИТХ-ын наймдугаар хуралдааны үеэр 2013 онд байгуулагдсан Яргуйт багийг 10 жилийн ойгоор нь дахин хувааж Баян-Овоо баг байгуулахаар тогтов. “Одоогоос 10 жилийн өмнө гуравдугаар сарын 29-нд Яргуйт багийг байгуулсан, 10 жилийн дараа Яргуйтчууд ойн өдрөөрөө Бая-Овоо багаа өлгийдөн авч байгаа сайхан хэрэг боллоо” хэмээн тус багаас аймгийн ИТХ-д сонгогдсон төлөөлөгч П.Ганзориг  “баярын сэтгэгдэл”-ээ журмын нөхөдтэйгээ хуваалцав.

Баян-Өндөр  сумын хэмжээнд 20046 өрх, 102177 иргэн, 22 багт хуваагдан ажиллаж, амьдарч байна. Нэг багт дунджаар 4640 гаруй иргэн харьяалагддаг. Гэтэл улсын дундаж нь нэг багт 1900 иргэн хамрагддаг тухай статистикийн мэдээллийг Баян-Өндөр сумаас гаргажээ. Үүний зэрэгцээ  тодорхой шалтгааны улмаас Цагаанчулуут, Эрдэнэ, Яргуйт багт хаягийн шилжилт хөдөлгөөн хийгдээгүй 105-150 гаруй айл өрх байгаа судалгааг нарийвчлан гаргасан байна.