2022 онд аймгийн хэмжээнд ЕБС-д “Хүүхэд хөгжил” төслийг хэрэгжүүлнэ. Энэ төсөл хэрэгжсэнээр сурагчдыг уран зохиол, дуу хөгжим, техник технологи, бие бялдрын чиглэлээр түлхүү хөгжүүлэх юм байна. Ингэхийн тулд ЕБын 17 сургуулийн биеийн тамир, дуу хөгжим, дүрслэх урлаг, технологи, монгол хэл уран зохиолын багш нар “Хүүхэд хөгжил” төсөлд хамрагдаж багш нарыг чадавхжуулах сургалтыг зохион байгуулах гэнэ. Засаг даргын Зөвлөлийн гишүүн, аймгийн Засаг даргын орлогч А.Түвшинжаргал “Жилийн өмнө ч байна уу аймгийн хэмжээний ЕБС-д технологийн хичээлд зориулж сургалтын техник хэрэгсэл нийлүүлсэн. Эрдэнэт үйлдвэр, аймаг орон нутгийн зүгээс орчин үеийн хүүхдийн техник сэтгэлгээг хөгжүүлэх зорилгоор ингэж хангасан. Үүний үр шим нэг их харагдахгүй байх юм. Энэ удаад Хүүхэд хөгжил гэсэн  төсөл хэрэгжүүлэх гэж байгаа нь сайшаалтай. Одоо хүүхдүүд цахим орчинд хамаг цагаа өнгөрүүлж байна. Энэ үед хөгжмийн боловсролыг хөгжүүлэх нь үнэхээр чухал. Сая яригдаж байна. Жингийн илүүдэлтэй хүүхэд 50 гаруй хувьтай гэж. Төрийн өмчийн сургуулиуд болж байгаа. Хувийн өмчийн сургуулиудын хэд нь өөрийн гэсэн спорт заалтай байна вэ. Судалгаа хийж үзсэн үү. Хүүхдээ бие бялдрын хувьд хөгжүүлэх цаг ирсэн учраас үүн дээр ч анхаарах цаг болсон” хэмээлээ.

Аймгийн засаг дарга С.Батжаргал “ ЕБС нь хүүхдийн хувьд айдсын орчин байх ёсгүй. Хүүхэд багшаасаа айдаг байх учиргүй. Гэрийн даалгавар хийгээгүйгээс болж багш загнах байх гэсэн айдастай хичээлдэг явдаг байж таарахгүй. Сургуулийн орчин хүүхдийн хүслийн газар байх учиртай. Өнөөдөр бид хүүхдийн хөгжлийн талаар ярихаасаа илүүтэй барилгын засвар, сантехникийн засвар л ярьдаг болсон. Сургуулийн барилга барьснаар боловсролын байгууллага сайн ажиллаж байна гэж дүгнэдэг болж. Сургуулийн үндсэн хүлээх үүрэг, агуулга алдагдсан байна. Боловсрол, шинжлэх ухааны газраас оруулж ирж байгаа энэ төслүүд зөв эхлэл болж байна. Цаасан дээр буулгахдаа шинжлэх ухаанч тал руу нь хандуулахын тулд судалгаатай байх хэрэгтэй. Төслийн ажилд амжилт хүсье” гэлээ..