“Эрдэнэт хивс” компани бүх нийтийн мод тарих өдрөөр нэг ч мод тариагүй талаарх байр сууриа манай сайтад утсаар илэрхийлсэн юм. Тус компанийн гүйцэтгэх захирал н.Дэлгэрмаа “Манай байгууллагад БОАЖГ-аас болон Сум, багаас тавдугаар сарын 13-15-нд бүх нийтээр мод тарих талаар мэдэгдээгүй. Бид ч мод тарих тухай ямар ч мэдээлэл аваагүй. Мод тарих тухай албан ёсоор мэдээлэл өгсөн бол манай байгууллагын 400-500 ажилтан мод тарихад бэлэн байсан. Манай байгууллагын энэ жилийн Ажлын төлөвлөгөөнд 1000 мод тарьж, ургуулах тухай туссан байгаа. Саяхан УИХ-ын гишүүн Д.Батлут  бидэнтэй уулзахдаа хивсчидтэйгээ хамтраад Гэр бүлийн төгөлд мод тарих талаар ярьж тохиролцсон. Манай байгууллагад мод тарих талаар мэдээлэл өгсөн бол тарих байсан. Гэхдээ бид удахгүй нөхөөд модоо тарина. Мэдээллээ өгөөгүй байж дарга нар мод тариагүй байгууллага гэж зарлаж, тодруулж байна. Багийн ажлын албанаас яриад яагаад мод тариагүй вэ гээд загнаж байна. Эхлээд мэдээллээ бидэнд өгөх хэрэгтэй. Манай компани аймаг, сумын Засаг даргын захирамжийн дагуу Бүх нийтийн цэвэрлэгээ гэсэн олон ажилд идэвхтэй оролцдог. Удахгүй Ажлын төлөвлөгөөнд туссан 1000 модоо тарихаар ажиллаж байна” гэлээ.

Аймгийн Засаг даргын даваа гарагийн шуурхайд БОАЖГ-ын дарга С.Жаргалсайхан Бүх нийтээр мод тарих өдрөөр аймгийн хэмжээнд хэдэн мод тарьсан, ямар байгууллагууд үүнд идэвхтэй оролцсон, оролцоогүй  талаар мэдээлэл хийсэн. Энэ үеэрээ “тавдугаар сарын 13-наас 15-ны хооронд мод тарих ажлыг зохион байгуулахад Эрдэнэт хивс компани оролцоогүй. Нэг ч мод тариагүй” талаар дуулгасан. Аймгийн ЗДТГ-ын дарга Д.Соёлчхүү шуурхайн өмнө хуралд оролцогч зарим дарга нараас хэдэн мод тарьсан, хэдэн хүн оролцсон талаар тодруулж байлаа. Улмаар аймгийн Засаг даргын шуурхайн төлөвлөгөөнд БОАЖГ-ын дарга С.Жаргалсайханы мэдээлэл хийх тухай санал нь батлагдсан тул тэрбээр дээрх мэдээллийг хийсэн юм.