Аймгийн Засаг даргын шуурхайд Баян-Өндөр сумын Засаг дарга Б.Баасансүрэн цаг үеийн ажлын талаар мэдээлэл хийлээ. Өнгөрсөн 7 хоногт Баян-Өндөр сумын зүгээс 160 гаруй иргэнд шинээр газар өмчлүүлэх ажлыг зохион байгуулжээ. Ингэхдээ өмнө нь газар эзэмших эрхийг цагаан хуудсаар авсан хэдий ч 2 жилийн хугацаанд хашаа бариагүй иргэдийн газрыг зохих дүрэм, журмын дагуу хураан 2012 онд газар хүссэн өргөдөл гаргасан иргэдэд олгосон байна. Иргэд газар эзэмших түр эрх болох цагаан хуудастай болонгуутаа миний газар юм чинь гээд хайхрахгүй, хашаагаа хатгахгүй байдал гардаг аж. Хууль ёсоор бол хашаагаа хатгаад улсын бүртгэлд бүртгүүлж гэрчилгээжүүлснээр таны газрын эрх баталгаатай болж хэн ч халдашгүй болох ажээ.

Мөн Баян-Өндөр сумаас 2023 оны зургаадугаар сарыг дуустгал шинээр тамхины худалдааны тусгай түр зөвшөөрлийг олгохгүй байхаар шийджээ. Харин өмнө нь тусгай зөвшөөрлөө авсан иргэн, аж ахуйн нэгж сунгуулах бол сунгалт хийх гэнэ. Ингэхдээ зөрчил гаргасан, насанд хүрээгүй иргэдэд тамхи худалдаалсан бол сунгалт хийхгүй байхаар болжээ. Өнөөдөр аймгийн хэмжээнд тамхи худалдаалах түр гэрчилгээтэй 400 гаруй аж ахуйн нэгж, иргэн байна. Б.Баасансүрэн дарга өнгөрсөн хугацаанд шинээр тамхи худалдаалах түр зөвшөөрөл 3-ыг олгосон байна. Манай аймагт “Монгол тамхи Со” компанийн бөөний  төв ажилладаг бол бусад нь жижиглэнгийн худалдаа эрхлэгчид байдаг гэнэ.