“Тогтвортой хөгжлийн төлөөх хамтын санаачилга, түншлэл-2022" Үндэсний чуулган өнөөдөр  “уурхайчин” соёлын ордонд нээлтэй хийлээ. 2019-2023 он хүртэл хэрэгжих “Тогтвортой хөгжлийн бодлого-II” /ТХБ-II/ төслийн хэрэгжилтийн үр дүн, оролцогч талуудын хамтын ажиллагаа, түншлэлийг дэмжих зорилгоор энэхүү чуулганыг зохион байгуулжээ. Чуулганд БШУЯ, БОАЖЯ, Швейцарын хөгжлийн агентлаг, аймгийн ЗДТГ, ТХБ-II төслийн загвар сургуулиудын удирдах ажилтан, багш, сурагчдын төлөөлөл  хамрагдав. Мөн “ТХБ-II” төсөл хэрэгжиж байгаа  зургаан аймаг, нийслэлийн 2 дүүргийн гишүүд оролцсон байна.

Аймгийн ИТХ-аар “Ногоон -Эрдэнэт 2030” хөтөлбөрийг баталсан. Хөтөлбөрийн хүрээнд тогтвортой хөгжлийн 16 зорилт тавьж ажилласан байна. Үүнд “Тогтвортой хөгжлийн боловсрол-2” төсөл хөтөлбөрт манай аймгийн ЕБС-уудаас 10 гаруй сургууль хүсэлт гаргаснаас дөрвөн нь шалгарсан байна. Тэдний нэг нь 14 дүгээр сургууль. Тус сургууль улсын хэмжээний загвар 30 сургууль болох зорилт тавин 2019 онд төсөл өгч шалгарснаар хэд хэдэн төслийг амжилттай хэрэгжүүлээд байна. Тухайлбал, сургуулийнхаа тогтмол зардлыг хэмнэж  дотор орчны бүх гэрлээ лед гэрлээр сольжээ.  
      Мөн “Эрчим хүч бидний амьдралд”, “Залга салга хэмнэ” төслийг бага, дунд ангийнхны дунд хоёр үе шаттай хэрэгжүүлж, хүүхдүүдэд  өөрийн амьдарч буй  орчиндоо зөв хэвшлийг бий болгох, бусдад эерэгээр нөлөөлөх дадлыг өгч чаджээ.

Аймаг, орон нутгаас шалгарсан  сургууль бүрд 30 гаруй сая төгрөгийн дэмжлэг үзүүлэх юм. Энэ үеэр манай аймагт Байгаль орчны чиглэлийн мэдлэг, мэдээллийг хүүхдээр дамжуулан эцэг эхчүүдэд олгох явуулын лабораторийг олгосон юм.

Энэхүү төсөл нь урт хугацааны хөгжлийн бодлого, хөтөлбөртэй уялдаж, иргэн бүрийн оролцоотойгоор байгаль орчинд ээлтэй, нийгэм, эдийн засгийн хариуцлагатай, тогтвортой, чанартай амьдралын хэв маягийг бий болгоход дэмжлэг үзүүлэх, иргэдийн боловсролоор дамжуулан хөгжлийг авчрах хамтын ажиллагааны загварыг бий болгохоор зорьж байгаа юм.