Ерөнхий боловсролыг 17 дугаар сургуулийн хичээлийн II байрны зарим анги, танхимын хана цуурч, шал нь цөмөрсөн учраас хүүхдүүд хичээллэх боломжгүй нөхцөл байдал 2021 оны есдүгээр сарын 6-ны өдөр бий болсон. Тэр цагаас хойш нэг жил өнгөрөөд байхад хичээлийн байрны засварын ажил гүйцэтгэгч, захилагч талын хоорондын маргаан, хөндлөнгийн дүгнэлт гаргуулах, хөндлөнгийн дүгнэлтийг эсэргүүцэж шүүхэд хандах зэрэг олон шалтгааны улмаас өнөөг хүртэл хийгдээгүй байна.

Биднийг хичээлийн II байранд очиход нөхцөл байдал хэвээрээ, хичээл эхэлэхд хүүхдүүд хүлээн авах ямар ч боломжгүй байдалтай байв. Өнөөдөр хуралдсан аймгийн Засаг даргын шуурхайд Боловсрол, шинжлэх ухааны газрын дарга О.Ариунгэрэлт “Энэ хичээлийн жилд 17 дугаар сургуулийн хичээлийн II байрны хүүхдүүдийг Аялгуу соёлын төвд хичээллэнэ” хэмээн мэдэгдэв. Шуурхайг даргалагч, аймгийн Засаг даргын орлогч М.Түвшинжаргал “Аялгуу соёлын төв асуудалтай шүү. Сайн үзэж хараарай. Анги танхимын агааржуулалт бий юү. Хүүхдүүд хичээллэх боломжийг нь сайн бүрдүүлэх тал дээр анхаар” хэмээн үүрэг өглөө.

“Аймаг орон нутаг хүүхдийнхээ төлөө, тэр дундаа 17 дугаар сургуулийн сурагчдын төлөө хөрөнгө мөнгөө гаргаад эхлээд засварын ажлыг хийнэ. 2022 оны есдүгээр сарын 1-н гэхэд хүүхдүүдээ хүлээн авахад бэлэн болгох тал дээр ажиллана. Дараа нь буруутай этгээдээс шүүхийн журмаар гарсан зардлыг төлүүлнэ. Тайван амгалан байцгаа. Санаа зоволтгүй. Бид хүүхдүүдийнхээ төлөө ажиллаж байна” хэмээн мэдэгдэж, мэдээлэл өгч байсан дарга нарын хуурмаг дүр төрхний балгаас 17 дугаар сургуулийн хүүхдүүд дахиад л хохирч байна.