Аймгийн ИТХ-ын ээлжит XIV хуралдаан хоёрдугаар сарын 28-нд хуралдсан. Хуралд аймгийн Орон нутгийн өмчийн газраас “Орон нутгийн Өмчийн байрны түрээсийн төлбөрийг шинэчлэн батлах тухай” тогтоолын төслийг оруулсан юм. Тогтоолын үндэслэл, тайлбарын талаар Орон нутгийн Өмчийн албаны дарга  Л.Оюунгэрэл саналаа танилцуулсан.

Аймгийн Орон нутгийн Өмчийн газраас түрээсийн төлбөрийн үнийг тогтоохдоо Төрийн өмчийн бодлого зохицуулалтын газраас ирүүлсэн дүрэм, журмын хүрээнд төдийгүй аймаг орон нутгийн хэмжээнд түрээсийн үнийн судалгааг хийсэн байна. Ингэсний үндсэн  дээр Орон нутгийн өмчийн байрны түрээсийн төлбөрийн шинэ үнэ тариф  2024 оны нэгдүгээр сарын 1-нээс хэрэгжих юм байна. Аймгийн ИТХ-ын төлөөлөгчид оруулж ирсэн үнийн санал дээр асуулт асууж саналаа хэллээ.

Аймгийн ИТХ-ын төлөөлөгч н.Майцэцэг “Сургуулиудын цайны газрын түрээсийн төлбөрийг нэмсэн саналыг дэмжихгүй байна. Сургуулийн хүүхдүүдэд үдийн цай хөтөлбөр хэрэгжүүлдэг, багш сурагчдад хоол, цайны үйлчилгээ үзүүлдэг хувийн хэвшлийн байгууллагын түрээсийн төлбөрийг яагаад нэмж байгаа юм бэ. Үүнийг дэмжмээргүй юм байна” хэмээсэн юм.

Орон нутгийн Өмчийн газрын дарга Л.Оюунгэрэл “Аймаг, орон нутгийн хэмжээнд цайны газрын түрээсийн төлбөрийг судалгааг хийсэн. Хувийн хэвшлийн хувьд нэлээн өндөр байдаг юм билээ. Дунджаар ийм хэмжээтэй байвал яасан юм бэ гэдэг саналыг манайхаас оруулж байгаа. Сургуулиудын цайн газрын түрээсийн төлбөр бол дам түрээс байдаг. Үүнийг дэмжих эсэх нь, түрээсийн төлбөрийг нэмэх нь аймгийн ИТХ-ын төлөөлөгчдийн бүрэн эрхийн асуудал. Та бүхэн хэлэлцээд шийдвэр гаргадаг” хэмээсэн юм.  

Хуралд оролцсон төлөөлөгчид төлөөлөгч  н.Майцэцэгийн “Сургуулийн цайны газрын түрээсийн төлбөрийг нэмэхгүй байх” гэдэг санал дээр санал хураав. Олонхийн  “Түрээсийн төлбөр нэмэхгүй” гэдэг санал дэмжигдсэн юм.