Аймгийн ЗДТГ, Санхүү төрийн сангийн хэлтсээс орон нутагт “Хөрөнгийн зах зээлийн мэдлэг олгох”, “Олон нийтийн санхүүгийн боловсрол” сэдвээр вэбнарыг амжилттай зохион байгууллаа. Энэ удаагийн вэбнарт “Хөрөнгийн зах зээлийн өнөөгийн нөхцөл байдал, Хөрөнгийн зах зээлд хэрхэн оролцох вэ, 1072 хувьцаа” сэдвээр Үнэт цаасны газрын референт А.Нинжин, “Банкны шинэчлэлийн хуулийн талаарх мэдээлэл” сэдвээр Үнэт цаасны газрын референт  Н.Энхбаатар, “Хяналт шалгалт, мөнгө угаах болон терроризмыг санхүүжүүлэхтэй тэмцэх асуудал” сэдвээр Мөнгө угаахтай тэмцэх албаны ажилтан Б.Батмөнх нар илтгэл тавьж хэлэлцүүлсэн юм.

Нутгийн удирдлагын ордны Хурлын танхимд болсон вэбнарт цахимаар 120 гаруй иргэн оролцсон бол танхимаар 20 гаруй оролцогч хамрагдан илтгэлүүдтэй холбоотой өөрсдийн сонирхсон асуултад хариулт авлаа.

Оролцогчдын хувьд референт А.Нинжингийн илтгэл мэдээллийн хувьд илүү өргөн хүрээнийх байж, оролцогчдын зүгээс 1072 хувьцааныхаа талаар болон цэнхэр, ягаан тасалбар, данс хэрхэн нээлгэх зэрэг асуудлаар сонирхсон мэдээллээ авсан юм. Харин илтгэгч Б.Батмөнхийн “Хяналт шалгалт, мөнгө угаах болон терроризмыг санхүүжүүлэхтэй тэмцэх асуудал” илтгэл оролцогчдод өргөн хүрээний анхан шатны мэдлэг олгохын зэрэгцээ, дэлхий нийтийн чиг хандлага ямар зүгт чиглэсэн, Монгол улсын өнөөгийн нөхцөл байдлын талаарх мэдээлэл сонирхол татаж байлаа.

Вэбнар нь хуралдахуй гэсэн ойлголт агаад тодорхой зохицуулалтын дүрэмтэй хийгддэг байна. Өөрөөр хэлбэл, дүрмийн хүрээнд оролцогчийн чиг үүргийг тодорхойлсон байдаг аж. Нэг удаагийн вэбнарт 500 хүртэлх оролцогч хамрагдах боломжтой ажээ. Вэбнарын нээлтэд аймгийн Засаг даргын орлогч А.Түвшинжаргал оролцов.