Монгол улсын Засгийн газар, Үндэсний худалдаа аж үйлдвэрийн танхимаас “ТОП-100” аж ахуйн нэгжийг зарлав. Үндэсний “ТОП-100” аж ахуйн нэгжийн 49 дүгээр байрт Эрдэнэтийн “Ачит Ихт” компани эрэмблэгдсэн байна

Тус компанийн хамт олон 2019 онд “ТОП-100” аж ахуйн нэгжийн жагсаалтад 60-д, 2020 онд мөн 60-д жагсаж байсан бол 2021 онд 59 дүгээр байрт орсон байна. Харин энэ удаад өмнөх амжилтаа 10 байраар ахиулж “ТОП-100”-гийн жагсаалтын 49-д бичигдсан аж. “ТОП-100”-г шалгаруулахдаа борлуулалтын орлого, татварын орлого, даатгуулагчийн тоо, ашгийн болон хөрөнгийн хэмжээгээр үнэлж дүгнэжээ. “Ачит Ихт” компанийн хувьд борлуулалтын орлогын хэмжээгээр 49-д, татварын орлогын эрэмбээр 28-д бичигджээ. Харин ашгийн хэмжээгээр 15-д, хөрөнгийн эрэмбээр 21-д, даатгуулагчийн тооны эрэмбээр 76-д бичигдсэн байна. Ингээд эцэст нь нийлбэр дүнг гаргахад “Ачит Ихт” компани “ТОП-100”-гийн жагсаалтад 49-д дуудуулжээ.

“Ачит Ихт” компанийн хамт олон Лондоны металлын биржид 99.999 буюу таван 9-ийн гэгдэх платинум зэрэглэлийн катодын цэвэр зэс үйлдвэрлэн нийлүүлдэг. Тус компани 2022 оны байдлаар

*** Улс, орон нутгийн төсөвт өсөн нэмэгдсэн дүнгээр 10 төрлийн татвар, төлбөр хураамжид нийт 50.7 тэрбум төгрөг төлжээ.

*** Ашигт малтмалын хуулийн дагуу “Үүсмэл орд”-ын тусгай зөвшөөрөл эзэмшигч болсноор АМНАТ-д 25.6 тэрбум төгрөг төлжээ.

*** Гэрээний дагуу “Эрдэнэт үйлдвэр” ТӨҮГ-т ашиглалтын төлбөрт 20.7 тэрбум төгрөг төлсөн байна.

*** “Ачит Ихт” ХХК 2022 оны байдлаар Монгол улсын экспортолсон катодын зэсийн 80 хувийг дангаар үйлдвэрлэжээ.

*** Орон нутагт 230 гаруй үндсэн ажлын байр бий болгон үндэсний 1627 ханган нийлүүлэгчээс 418 тэрбум төгрөгийн худалдан авалт хийсэн байна.

Ийнхүү “Ачит Ихт” компанийн хамт олон “ТОП-100”-гийн тайзнаа Орхон аймаг, Эрдэнэт хотын нэрийг дуурсгалаа.