Цагаанчулуут багийн “Их хаадын цуваа хороолол”-ын 3, 5, 7 дугаар байрны иргэд Үндсэн хуульд заасан Эрүүл аюулгүй орчинд амьдрах эрхээ эдэлж чадахгүй байна. Хэзээ энэ овоолсон шороо нураад ирэх бол, хүүхдүүд овоолсон шороон дээр гарчих вий гэсэн айдас, түгшүүртэйгээр амьдарч байна. “Эрдэнэт констрактив” гэдэг компанийн ухаад хаясан нүх, овоолсон өндөр шороо иргэдийг айдаст автуулж, нойргүй хонуулж байхад аймаг, орон нутгийн зүгээс “нүдэн балай чихэн дүлий” гэгч л сууна.

Ямар ч байсан Цагаанчулуут багийн дээрх 3 байрны оршин суугчид аймгийн ИТХ-д энэ тойргоос сонгогдсон аймгийн Засаг даргын орлогч А.Түвшинжаргал, Хотын захирагчийн албаны дарга С.Ганцогт, сумын ИТХ-д сонгогдсон Баян-Өндөр сумын ИТХ-ын дарга Э.Эрдэнэбат, Цагаанчулуут багийн Засаг дарга Б.Мөнхзаяа нарт хэвлэлээр дамжуулан хандаж байна. Орно нутгийн сонгуулиар та бүхэн “Хүчээ нэгтгэе” уриатайгаар оролцож бидний саналыг авсан. 

Аяганы хариу өдөртөө агтны хариу жилдээ гэдэг монгол үг ч бий. Одоо бидний төлөө ажиллаж Үндсэн хуулиар олгогдсон бидний амьд явах эрхийнхээ хүрээнд энэхүү овоолсон шороог Хүчээ нэгтгээд буулгаад өгөөч, эрүүл аюулгүй орчинд амьдрах нөхцөлийг хангаж өгөөч, амьд явмаар байна гэж хүсэлт гаргаж байна. Хэдий болтол бид аюултай орчинд амьдрах юм бэ. Асуудал үүсвэл хэн хариуцлага хүлээх вэ. Иргэд сонгогчдынхоо төлөө одоо л ажиллахгүй юм бол хэзээ юу хийх гээд байгаа юм бэ хэмээн хандаж байна.