Аймгийн Засаг даргын даваа гарагийн шуурхай хуралдав. Шуурхайн ирцийн бүртгэлээс харвал өмнөх шуурхайг тодорхой шалтгаангүй тасалсан “Эрдэнэт өртөө”-ний дарга Т.Доржжанцан, Гүний гаалийн газрын дарга Б.Майдармаа нар шуурхайд дахиад л ирсэнгүй, сураг алдарчээ.

 Мөн энэ өдрийн шуурхайд “Эрдэнэтийн дулааны станц” ТӨҮГ-ын дарга Г.Бат-Эрдэнэ, “Эрдэнэт Булганы цахилгаан түгээх сүлжээ” ТӨХК-ийн дарга В.Адъяа нар шуурхайд морилсонгүй. Шуурхайн дундуур В.Адъяа даргын орны хүн болох байгууллагын инженер нь хоцорч ирсэн юм. Засаг дарга С.Батжаргалын зүгээс төрийн болон орон нутгийн өмчит байгууллагын удирдлагууд, аймгийн ЗДТГ-ын хэлтэс, агентлагийн дарга нарыг даваа гарагийн нэг цагаа  Эрдэнэтчүүдийн төлөө, Эрдэнэт хотын иргэдийн өмнө тулгамдсан асуудлыг шийдвэрлэхэд зориулах ёстой гэсэн шаардлага тавьдаг.  Харин том толгойтой зарим дарга нар “чаддаг юм бол намайг шуурхайдаа муулга л даа, би босоо удирдлагатай байгууллагын дарга хүн шүү  гэж томроод шуурхайд ирэхгүй байх нь ердийн үзэгдэл болжээ.