Аймгийн татварын хэлтсээс шилдэг татвар төлөгчдөө шагнаж урамшуулсан. Энэ үеэр татварын хэлтсийн Бичил татвар төлөгчидтэй харьцах тасгийн дарга Д.Буяндэлгэр дараахь мэдээллийг өгсөн юм. Тэрбээр, “Жил бүрийн тавдугаар сарын 2 дахь долоо хоногийг татвар төлөгчдийн өдөр болгон тэмдэглэдэг уламжлалтэй. Энэ жилийн хувьд “Цахимаар үйлчлүүлье” уриан дор явагдаж байна. “Цахимаар үйлчлүүлье” уриа маань яагаад гарсан бэ гэхлээр ерөнхийдөө татварын албаны үйл ажиллагаа 100 хувь цахимжсан. Тийм учраас бид татвар төлөгчиддөө цахим үйлчилгээгээ санал болгож байна. Мөн цахим үйлчилгээгээ сурталчлан таниулах зорилгоор энэ жилийн хувьд “Цахимаар үйлчлүүлье” уриа дэвшүүлэн ажиллаж байна. Энэ ажлын хүрээнд бид олон арга хэмжээ зохион байгуулж байна. Өнөөдрийн хувьд Орхон аймгийн болоод улсын төсөвт үнэтэй хувь нэмэр оруулсан, орон нутгийнхаа хөгжил дэвшилд хувь нэмрээ оруулсан татвар төлөгчдөө сигмент бүрээр нь ангилан алдаршууллаа. Үүнд дунд сигментийн татвар төлөгч, жижиг сигментийн татвар төлөгч, бичил сигментийн татвар төлөгч нараасаа алдаршуулж байна. Ингэхдээ төсөвт төлсөн татвар болон тайлан тушаалтаараа тэргүүний байсан татвар төлөгчдөө алдаршуулж шагнал гардууллаа.

Дунд сигментийн Шилдэг татвар төлөгчөөр тэргүүний татвар төлөгч “Бүтээл” компани шалгарсан. Жижиг сигментийн татвар төлөгчөөр “Хангайн бүс худалдааны төв” компани шалгарсан. Харин бичил сигментийн шилдэг татвар төлөгчөөр “Тэмүүжин Оргил” компани шалгарлаа. Иргэдийн хувьд Мөнхбаяр, Баярмаа гэсэн хоёр иргэн 2022 оны шилдэг татвар төлөгч болж байна.

Улсын хэмжээнд бас тэргүүний шилдэг татвар төлөгчөө шалгаруулдаг. Манай аймгийн бичил сигментийн татвар төлөгч болох “Ажнайн мандал” компани улсын хэмжээний шилдэг татвар төлөгчөөр шалгарч байна. Орхон аймгийн нийт татвар төлөгчиддөө татвар төлөгчдийн өдрийн мэнд дэвшүүлье” хэмээсэн юм.