Эрдэнэт хотод анх удаа Эрчим хүчний хэмнэлттэй амины орон сууцны Ногоон хотхон барих гэж байна гэсэн мэдээлэл цацагдаад эхлэхэд, Тусгал-1 Телевиз фэйж хуудас руу олон хүн хүсэлт илгээж, дэлгэрэнгүй мэдээлэл аваад өгөөч гэсэн. Сонгууль дөхсөн болохоор уран гоё амлалтын нэг биш байгаа дээ гэж бодсон ч бусдад мэдээлэл өгье гээд очлоо. Аймгийн Иргэдийн хурлын дарга Д.Мөнхбатын санаачилсан энэ төсөлд Эрдэнэ багт 3,4 га газрыг орон нутгаас үнэгүй өгч, гүйцэтгэгч барилгын компанийг дэмжиж байгаа юм байна. Эрдэнэ баг нь Дэнж багийн хойд хэсэгт буюу агаар ус сайтай, хөдөөрхүү газар байршдаг. Газрын байршлын хувьд эрүүл, хотоос бага зэрэг зайдуу, агаар сайн гээд боломжийн юм байна.

Бид зуслангийн шовгор барих гэж багахан газрыг зах зээлээс худалдаж авдаг. Харин энд орон сууц барих 150-400 м.кв газрыг иргэнд үнэгүй олгоно. Нийт 3,4 га газар дээр 34 айлын 65 м.кв Таун хаус, 103,7 м.кв Твин хаус, 142 м.кв, 153,2 м.кв Сингл хаусуудыг сүндэрлэн босгох компаниар "Хайбрид хаус" ХХК-ийг сонгож, Орхон аймгийн өнөөгийн эрх баригчид Хамтран ажиллах гэж байна.

Эрдэнэт хотод анх удаа хотоос зайдуу агаар сайтай Эрдэнэ багт баригдах гэж байгаа "Эрчим хүчний өндөр хэмнэлттэй анхны жишиг ногоон хотхон"-ы төслийг хэрэгжүүлэх гэж байгаа "Хайбрид хаус" ХХК-ийн залуу инженерүүд 2017 онд эрчим хүчний өндөр хэмнэлттэй цахилгаан халаагуур үйлдвэрлэх зорилготой байгуулагдсан. 2000 гаруй айлыг цахилгаанаар халааж, Хабрид технологиор 100 айлын амины орон сууцыг ашиглалтад оруулсан туршлагатай, инженерийн мэргэжил, хүсэл тэмүүлэлээрээ ид оргилж яваа залуу инженерүүдийн баг ажиллах юм байна.

Энэ Ногоон хотхоныг санаачилсан аймгийн ИТХ-ын дарга Д.Мөнхбатыг мэдлэг, боловсрол, хувь хүний төлөвшлийн хувьд одоогийн эрх баригчдын удирдлагууд дундаас ноён нуруутай хүн гэж би хувьдаа үнэлдэг. Эдийн засагчийн хувьд ч тооцоо, судалгаан дээр сайн ажилласан байх. Тиймээс Д.Мөнхбатын санаачилсан энэ Жишиг хороолол хамгийн сайн Төсөл болон хэрэгжиж, иргэдэд үр дүнгээ өгнө гэж найдаж байна.

Иргэн та, Эрдэнэт хотод анх удаа эхлүүлсэн Эрдэнэ багт баригдах анхны Жишиг Ногоон хотхоны талаарх илүү дэлгэрэнгүй мэдээллийг 8810-6942, 7777-1221 дугаарын утас, sales@hybridhouse.mn хаягаас, HybridGarden фэйсбүүк хаягаас аваарай. Жишиг Ногоон хотхоны хаусын м.кв-ийн үнэ ханшийг орон сууцны байрны үнээс өндөр байлгахгүй гэсэн байр суурийг гүйцэтгэгч компанийн Захирал ярьж байна.

Солонгосын кинонд гардагтай адил маш цэвэрхэн, хүүхдийн тоглоомын болон амралтын, спортын бүстэй хотын төвөөс холгүй биш ч хэдхэн минутанд машинаар хот руугаа ороод ирдэг, эрчим хүчний хэмнэлттэй, ногоон орчинд ногоон хаусууд удахгүй Эрдэнэт хотод сүндэрлэн босох нь ээ. Шинэ ажлын эхлэлийг "Жишиг Ногоон хотхон"-ыг дүрсэлсэн ерөнхий зургаар амтат бялуу хийж, Хотхоны нээлтийн үеэр тэнд ирсэн хүүхдүүдэд хувааж өглөө. Хүүхэд баярлуулж эхэлсэн ажлын үйлс нь дэлгэрэх байх аа.