Орхон аймаг улсын хэмжээнд “Нэгдсэн менежментийн тогтолцоо нэвтрүүлсэн” анхны аймаг болж байна. Энэ утгаараа бусад аймгийнханд стандарт нэвтрүүлсэн туршлагаасаа хуваалцах зорилгоор аймгийн ИТХ-ын Ажлын албанаас “Чанарын Форум-2024” уулзалт өдөрлөгийг зохион байгууллаа. Энэ талаар аймгийн ИТХ-ын дарга Д.Мөнхбатаас тодрууллаа.

-Өнөөдрийн  байдлаар аймгийн хэмжээнд хэдэн стандарт мөрдөж байна вэ? Үр дүнгээсээ яривал?

-Төрийн байгууллагуудаас стандарт нэвтрүүлсэн анхны аймаг болж байна. Мэдээллийн аюулгүй байдлын болон Авлигалын эсрэг стандарт нэвтрүүлсэн. Хоёроос дээш стандарт нэвтрүүлснээр “Нэгдсэн менежментийн тогтолцоо” нэвтрүүлсэн аймаг болж байгаа. Яагаад нэвтрүүлсэн бэ гэвэл НҮБ-ын тогтвортой хөгжлийн 17 зорилт, Засгийн газрын Урт хугацааны хөгжлийн хөтөлбөр Алсын хараа 2050, дунд хугацааны бодлогын бичиг баримт, ЗГХЭГ-ын аймаг орон нутаг руу өгч байгаа зөвлөмж чиглэлийн хүрээнд төрийн бүтээмжийг сайжруулах шаардлага бий болсон.

Төрийн бүтээмж сайжирсанаар төрийн үйлчилгээ авч байгаа иргэдийн сэтгэл ханамж дагаад нэмэгдэнэ. Ингэхийн тулд төрийн байгууллага өөрөө стандарттай болж ажлын бүтээмжээ сайжруулах ёстой. үйчлүүлдэг, хүртээмжтэй байдал нэмэгдэнэ гэж үзэж байгаа.

Тийм учраас анх удаа Орхон аймгийн 11 төрийн байгууллага хоёр стандартыг нэвтрүүлсэн. Энэ бол “Олон улсын чанарын менежментийн тогтолцоо ISO 9001:2015”, “Байгаль орчны менежментийн тогтолцоо ISO 14001:2015” гэсэн хоёр стандарт юм.

Төрийн бүтээмжээс гадна тухайн байгууллага нь стандарттай ногоон хамт олон болох, байгаль орчинд ээлтэй байгууллага болох зорилт тавьж байна.

-Төрийн байгууллагууд стандартын хэрэгжилтийн үр дүнд ямар амжилтад хүрэв?

-Төрийн 11 байгууллага стандартаа амжилттай нэвтрүүллээ. Энэ бол бараг гурван жилийн өмнө болсон процесс юм. Үргэлжлүүлээд манай зарим төрийн байгууллагууд Авлигын эсрэг стандарт, Аймгийн ИТХ нутгийн өөрөө удирдах ёсны байгууллагуудаас анх удаа “Мэдээллийн аюулгүй байдлын стандарт”-ыг нэвтрүүлж байгаа.

Орхон аймгийн ИТХ-ын найм дахь удаагийн бүрэн эрхийн онцлох зүйл бол “Цахим хот” болох зорилт тавьж, төрийн нэлээдгүй үйлчилгээ цахимжсан. Ингэж цахимжихын хэрээр түгээгдэж байгаа мэдээлэл, хадгалагдаж байгаа мэдээлэл яах ёстой вэ гэхээр нууцлалтай, аюулгүй байх ёстой. Үүнийг хангахын тулд бид дэлхий нийтэд хэрэглэгдэж байгаа, хүлээн зөвшөөрөгдсөн “Мэдээллийн аюулгүй байдлын стандарт”-ыг нэвтрүүлэх шаардлага гарсан. Иймд аймгийн ИТХ манлайлаад анхны стандартыг нэвтрүүлсэн аймаг боллоо.

“Мэдээллийн аюулгүй байдлын стандарт”-ыг нэвтрүүлэхэд баталгаажуулалт хийдэг компани Монголд байдаггүй юм байна. Бид БНСУ-ын 50 гаруй улс оронд баталгаажуулалт хийсэн компанид хандсан. Уг компанийн 20 гаруй мянган баталгаажуулалтаас “Мэдээллийн аюулгүй байдлын стандарт”-ыг нь нэвтрүүлж авсан. Тиймээс бид өөрсдийнхөө хийсэн дээрх ажлаасаа бусаддаа хуваалцъя гэсэн үүднээс энэ удаагийн форумыг зохион байгуулж байна.

-Форумыг өргөн хүрээтэй хийсэн байна. Ямар байгууллагууд оролцсон бэ?

-Энэ форумд Стандартчилал хэмжил зүйн газрын хамт олон, Засгийн газрын хэрэг эрхлэх газраас, Хөвсгөл, Булган, Орхон аймгийн төрийн байгууллагуудын төлөөлөл оролцлоо. Энд бид стандарт хэрэгжүүлсэн үр дүнгээ ярьж байна. Жишээ нь, форумын оролцогчдын мандатны гаднах уутыг олон дахин ашиглаж болно. Доторх нь цаас гэж харагдаж байгаа ч энэ нь нэг удаа хэрэглэх саван юм. Хаягдах цаас биш. Энэ нь бидний “Байгаль орчны стандарт”-ыг хэрэгжүүлж байгаагийн үр дүн юм. Магадгүй бид стандарт нэвтрүүлсэнээр хурал цуглаан форум болоход цаас бариад хүн бүртгэдэг байсан бол энд оролцогчид өөрсдөө QR код уншуулаад бүртгүүлэх боломжийг бүрдүүлсэн. Ингээд стандартын үр дүнг алхам тутамдаа харуулаад явж байгаа. Бидний ажил сайжраад байна гэдэг нь гадны хэрэглэгчид болох төрөөс үйлчилгээ авч байгаа иргэдийн сэтгэл ханамж сайжрах ёстой.

Стандарт нэвтрүүлсэний үр дүнд манай төрийн байгууллагууд ажлынхаа үзүүлэлтүүдээр тэргүүлж байгаа. Үр дүн нь өнөөдөр биш юм гэхэд алсдаа сайн үр дүн гарна гэдэгт итгэлтэй байна.

Ярилцсан: Б.РЭНЦЭНХАНД