Орхон аймаг баяр наадмаа энэ жил наймдугаар сарын 1,2-д явуулахаар аймгийн ИТХ-ын хуралдаанаараа баталсан. Учир нь Эрдэнэт хот, “Эрдэнэт үйлдвэр”-ийг бүтээн босгосон “Илгээлтийн эзэд-50” жилийн түүхэн ой давхацсан тул наадмаа хойшлуулаад байгаа. Сумдын 100 жилийн ойн баярыг долдугаар сард багтааж хийгээд дууссан энэ үед Эрдэнэтийн наадмыг наадамчид харж, ажиглан харьцуулах нь зүйн хэрэг. “Баян төсөв”-тэй гэгддэг Орхон аймаг энэ жил Илгээлтийн эздээ хүндэтгэхийн зэрэгцээ хурдан морины Хангайн бүсийн уралдаантай хамтатган  тэмдэглэхээр Засгийн газрын тогтоол гаргуулсан. Үүнтэй холбоотой аймгийн ИТХ-ын Ээлжит бус 16 дугаар хуралдаанаар Орхон аймгийн баяр наадмын хороог байгуулж,  зардлын задаргааг хэлэлцээд, 1 тэрбум 28 сая төгрөгөөр наадамдахаар батлуулжээ. 

Баяр наадмыг зохион байгуулах хорооны даргаар аймгийн Засаг даргын орлогч Д.Соёлчхүү, нарийн бичгийн даргаар аймгийн ЗДТГ-ын Цэргийн штабын дарга, хурандаа Б.Оюунтүлхүүр ажиллана. Бүрэлдэхүүнд нь аймгийн ИТХ-ын Төлөөлөгч болон төрийн жинхэнэ болон тусгай 39 албан хаагч гишүүдээр ажиллах юм байна.   

Энэ жил Хангайн бүсийн хурдан морины уралдааныг Орхон аймагт зохион байгуулахтай холбоотой наадмын бөх, хурдан морь, сур, шагайн холбооны бай шагнал, тохижилт, үйлчилгээ, наадмын нээлт соёл урлагийн зардал нэмэгдэж байгаа аж. 

Наадмын нээлт, хаалтын урлаг соёлын үйл ажиллагаанд 800 гаруй уран бүтээлч, хүүхэд багачууд оролцож, тэдэнд олгох урамшууллын хэмжээг нэмж, нэг хүүхдэд 100 мянган төгрөгөөр тооцон төсвийг баталсан. Наадмын өдрүүдэд наадамчдаас гадна Эрдэнэт хотын ах, дүүгийн найрамдалт харилцаат гадаад улсын 20 гаруй зочин  Орхон аймгийн баяр наадмыг үзэж сонирхоно.