Аймгийн ИТХ-ын төлөөлөгч С.Ганцогтын санаачилгаар аймгийн ЗДТГ-аас Боловсрол шинжлэх ухааны яамтай хамтран “Дижитал хот” зөвлөгөөнийг зохион байгууллаа. Зөвлөгөөнөөр Боловсролын яамны Цахим боловсролын газраас хувийн хэвшлийн байгууллагуудтай хамтран салбарын хэмжээнд хэрэгжүүлж байгаа цахим туршлагуудыг танилцуулсан. Энэ үеэр аймгийн ИТХ-ын төлөөлөгч С.Ганцогттой ярилцлаа. -Боловсролын салбарт цахим шилжилт хурдацтай явж байгааг мэргэжлийнхэн онцоллоо. Манай аймагт хэрэгжүүлэхэд юунд анхаарах шаардлагатай вэ? -Манай аймаг “Цахим-Ухаалаг” хөтөлбөрийг хэрэгжүүлж байгаа. Цаашид “Цахим-2” төслийг хэрэгжүүлнэ. Энэ хүрээнд Эрдэнэтийн төрийн байгууллагуудыг цахимжуулах, төрийн үйлчилгээг ил тод нээлттэй хүргэх, боловсролын салбарт эцэг эхийн оролцоог нэмэгдүүлэх чиглэлээр хүүхдийн суралцах орчин нөхцлийг сайжруулахыг зорьж байна. Хүүхдүүд хүнд цүнхтэй, даалгавар ихтэй байна гэдэг. Энэ бэрхшээлийг багасгахын тулд бага ангийн боловсролыг интерактив тогтолцоонд шилжүүлэх, сурах бичгийг цахимд шилжүүлэхтэй уялдуулан Боловсролын яамнаас хийж байгаа ажлуудыг нийтэд мэдээлэл хүргэхэд анхаарч байна. -Хүүхдийн “Үдийн хоол” хөтөлбөрт эцэг эхчүүд хяналт тавих боломжийг цахимаар бүрдүүлсэн туршлага байна. Өөр ямар чиглэлээр хамтрах нөхцөл байгаа вэ? -Нөгөө талаар “Үдийн цай” хөтөлбөрт орон нутгаас дэмжлэг үзүүлж хоолны чанарт анхаарч байгаа. Орон нутгаас дэмжиж байгаа “Үдийн хоол”-ны шим тэжээлийн байдалд эцэг эх хяналт тавих тогтолцоог нэвтрүүлэх боломжийг бүрдүүлэх хүрээнд Улаанбаатар хотын цэцэрлэгт нэвтрүүлсэн системийг Эрдэнэтэд танилцуулж байна. Ингэснээр цэцэрлэгийн хүүхдүүд болон бага ангийн хүүхдүүдэд үдийн цай хөтөлбөр дээр нь эцэг эхийн оролцоог нэмэгдүүлэх, чанар хүртээмжийг сайжруулах тал дээр анхаарах боломжууд байгаа. Улаанбаатарт амжилттай хэрэгжиж байгаа энэ боломжуудыг Эрдэнэтэд нэвтрүүлэхээр хэрэгжүүлэгч компаниудын удирдлагыг урьж, мэдээлэл авч байна. Дээрх хөтөлбөрүүд нэвтэрснээр цаг хугацааны хувьд цахим шилжилт рүү шилжье, үүний үр дүнд иргэдийн дундах үл ойлголцлууд багасах сайн талтай. Цаашдаа боловсролын салбарын цахим шилжилтэд онцгой анхаарах, иргэд, эцэг эхийн оролцоог нэмэгдүүлэх, сургалтын хэлбэрийг өөрчлөх, интерактив сургалтуудыг нэвтрүүлэхэд онцгой анхаарч ажиллая гэсэн зорилготой энэ удаагийн хэлэцүүлгийг хийж байна.