Аймгийн ИТХ-ын Зөвлөлийн хурлаар Орон нутгийн өмчийн газраас орон нутгийн өмчтэй холбоотой таван журамд өөрчлөлт оруулах, Эрдэнэт Ус ДТСОНӨК, Жаргалант ус ДТСОНӨК-ийн ТУЗ-ийн гишүүдийг томилох зэрэг асуудлыг оруулж ирсэн ч буцаагдаж, танилцуулгыг дахин бэлтгэхийг үүрэг болгов. Орон нутгийн өмчтэй холбоотой журмын өөрчлөлт дээр орон нутгийн онцлогийг нарийн тусгахыг сануулав. Эдгээр орон нутгийн өмчтэй холбоотой журмуудыг тус тусад нь судалж, танилцуулгыг ойлгомжтой хийх талаас нь анхаарахыг зөвлөлөө. Орон нутгийн өмчид эд хөрөнгө олж авах, бүртгэх, данснаас хасах, шилжүүлэх, дуудлага худалдаа зохион байгуулах, түрээслүүлэх, өмч хамгаалах байнгын зөвлөлийн ажиллах журмыг шинэчлэн батлуулах асуудлыг хэлэлцүүлсэн. Дээрх журмуудыг шинэчлэх шалтгаан нь аймгийн ИТХ-ын тэргүүлэгчдийн хурлаар журмыг баталсан байдаг. Харин Тэргүүлэгчдийн хурлын оронд Зөвлөлийн хурал ажиллаж байгаа учир эрх зүйн талаас өөрчлөх шаардлага гарсан. УИХ-аар Төрийн өмчит аж ахуйн нэгжийн хувьчлалын асуудлаар Ажлын хэсэг байгуулагдан ажиллаж байгаа ч хуульд орох өөрчлөлтийг хүлээх нь цаг хугацааны хувьд боломжгүй. Иймд дээрх журмуудыг энэ сарын 24-нд хуралдах аймгийн ИТХ-ын нэгдсэн хуралдаанаар хэлэлцэхээр оруулж байгаа юм.