Соёл урлагийн ажилтны 29 дэх жилийн  өдрөөр “Эгшиглэн” Соёлын төв урлагийн дугуйлангийн суралцагчдынхаа дуу хуур, хүүхдийн амьд хөгжмийн хамтлагийн тоглолтоор Эрдэнэтчүүддээ бэлэг барьлаа. Эрдэнэт хот, Орхон аймгийн ууган багуудын нэг болох Говил багт үйл ажиллагаа явуулдаг “Эгшиглэн” Соёлын төвийн уран бүтээлчид Амарын талбайд урлагийн тоглолтоо толилуулсан юм. Энэ үеэр тус төвийн урлаг, соёлын дугуйлангийн сурагчид авьяас чадвараа сонирхуулж, үе тэнгийнхэндээ урлаг, соёлыг танин мэдүүлэх үйлсэд оролцсон юм.

Монгол үндэсний дархлаа болсон соёл урлагийг хөгжүүлэх түгээн дэлгэрүүлэх үйл хэрэгт авьяас, ур чадвараа зориулан ажилладаг урлаг соёлын соён гэгээрүүлэгчид, урлагийн ажилтнуудын баярыг жил бүр есдүгээр сарын энэ өдрүүдэд тэмдэглэдэг уламжлалтай. Энэ удаа Орхон аймагт үйл ажиллагаа явуулж байгаа Соёлын төвүүд “Соёлын орон зай” урлагийн болон танин мэдэхүйн өдөрлөг зохион байгуулж байгаа юм. Эдгээр соёлын төвүүдийн урлагийн тоглолтоос “Эгшиглэн” Соёлын төвийн сурагчдын амьд хөгжмийн “Эгшиглэн” хамтлагийн тоглолт үзэгч болон үе тэнгийнхэнд нь таалагдсан тоглолт болсон юм.

Орхон аймгийн алслагдсан багийн нэг Говил багийн “Эгшиглэн” Соёлын төвийнхөн энэ жилийн сургалтын үйл ажиллагаандаа залуу, идэр насныханд зориулсан танин мэдэхүйн боловсрол олгоход анхаарна гэв. Мөн хүүхдэд ном унших дадлыг эзэмшүүлэх сонирхолтой аргад суралцуулах, монгол үндэсний тоглоом наадгай, өв соёл ,уламжлалын танин мэдэхүйн боловсрол олгоход бодлого барьж ажиллах юм байна.