Ковид-19 цар тахлын эсрэг хуулийн үргэлжилсэн хугацаа буюу 2020 оны дөрөвдүгээр сарын 29-нөөс 2022 оны 12 дугаар сарын 31 хүртэл үргэлжилсэн. Энэ хугацаанд буюу ковидын хууль хэрэгжиж байсан үед Орхон аймагт төрийн албаны удирдах албан тушаалд 51 хүнийг томилсон байна. Дээрх 51 албан тушаалтнаас 35 нь төрийн албаны шалгалтанд тэнцсэн учир албан тушаалаа үргэлжлүүлэх боломжтой. Харин үлдсэн албан тушаалтныг Ковидын хуулийн хугацаа дууссан учир энэ оны нэгдүгээр сарын 1-нээс эхлэн албан тушаалаас нь чөлөөлж, төрийн албаны шалгалтанд орсоны дараа томилох эсэх нь яригдах юм.

Хотын захирагчийн алба, Нийтийн номын сан зэрэг байгууллагын удирдлагыг аймгийн Засаг дарга шийдвэрлэнэ. Хүүхэд залуучуудын театр, “Аялгуу” Соёлын төв зэрэг байгууллагын удирдлагын албан тушаалд тусгай шалгалт авна. Сургууль, цэцэрлэг зэрэг төрийн үйлчилгээний байгууллагын 18 удирдах албан тушаалтан ковидын үед томилогдсон. Эдгээр хүмүүс дээр албан тушаалаас түр чөлөөлөх, төрийн албаны шалгалтын дараа дахин томилох эсэхийг Баян-Өндөр сумын Засаг дарга шийдвэрлэнэ. Үүнээс гадна III сургуулийн өмнөх захирал шүүхэд хандсан учир одоогийн захирлын томилгооны асуудал шүүхээр эцэслэн шийдвэрлэхийг хүлээж байна. Ковидын үед томилогдсон сургууль, цэцэрлэгийн эрхлэгч нараас албан тушаалын шаардлага хангаагүй хоёр хүн байна.  Энэ талаар аймгийн Засаг даргын орлогч А.Түвшинжаргал мэдээллээ.