Цагдаагийн ерөнхий газрын Хар тамихитай тэмцэх газраас Орхон аймагт дөрөв хоногийн хугацаатай ажиллаж байна. Уг газраас эцэг эх, асран хамгаалагчид, сургууль боловсролын байгууллага, төрийн байгууллагын албан хаагчид буюу томчуудад дэлгэрэнгүй мэдээлэл өгч, сургалтууд хийнэ. Харин ерөнхий боловсролын сургуулийн сурагчдад электрон тамхины хор хөнөөлийн талаар мэдээлэл өгөх юм.

Улсын хэмжээнд хар тамхи, мансууруулах, сэтгэцэд нөлөөлөх эмтэй холбоотой гэмт хэргийн тоо, дээрх төрлийн ургамлын байгалийн ургалттай газрын тоонд Орхон аймаг ордог. Зөвхөн гадаад орнуудад яригдддаг байсан хар тамхины сэдэв манай улсад сүүлийн жилүүдэд хурдтай түгэн тархаж, нийгэмд аюулын харанга болоод байна. Мансууруулах сэтгэцэд нөлөөлөх эм, бодис хэтрүүлэн хэрэглэснээс Монгол улсад есөн хүн нас барсан нь дээрхийг гэрчилж байна” гэж ЦЕГ-ын Урьдчилан сэргийлэх, хамтын ажиллагааны хэлтсийн дарга, дэд хурандаа Б.Батхуяг ярьлаа.

Монгол Улсын хэмжээнд 14 аймгийн 30 суманд байгалийн гаралтай канабис ургадаг. Мөн кашис гэж нэрлэдэг мансууруулах төрлийн бодисыг гараар бэлддэг. Гадаадын орнуудаас олон төрлийн хэлбэр бүхий сэтгэцэд нөлөөлөх эм, бодис манай улсад ихээр оруулж ирж байна. Орхон аймагт мансууруулах төрлийн ургамлын ургалтыг усгах ажлыг жил бүр хийдэг. Манай аймгаас мансууруулах төрлийн бодистой холбоотой 82 гэмт хэрэг бүртгэгджээ. Эцэг эхчүүд хүүхэддээ тавих хараа хяналт муу, цахим хэрэглээгээр хэдэн цаг, хэчнээн өдөр юу хийж, ямар хүмүүсээр тархиа угаалгаж байгааг нь анхаардаггүй. Саяхан 14 настай хүүхэд цахимаар 100 гаруй сая төгрөгийн залилан хийсэн мөнгөөрөө сэтгэцэд нөлөөлөх бодис авч, хэрэглээгээ хэтрүүлж, эмнэлэгт хүргэгдэхэд үед эцэг эх нь мэдсэн тухай цагдаагийн ажилтан ярьж байна.

Хар тамхи хэрэглэсэн хүүхэд, залуус ааш авир нь түрэмгий болох, өдөржин унтах, эсвэл нойргүй болох, хэл яриа нь ээдрэх, хүүхэн хараа нь томрох, нүдний салст нь улайх зэрэг биеийн хэлэмжийн өөрчлөлтүүд нь ил байдаг. Мансуурсан үедээ ээжийгээ зодож байгаа жүжигчин, төрийн ордонд электрон тамхи татсан дуучны үйлдэл зэргийг олон нийтэд үзүүлсэн нь дээрх гэмт хэргээс сэрэмжлүүлсэн. Гэсэн ч эдгээр нь сөрөг үр дагавар үүсгэсэн гэж мэргэжлийнхэн ярьлаа. Бидний үр хүүхэд цахимд хэтэрхий донтож, ганцаараа байхыг хүсэх, мөнгөний хэрэглээ нь огцом нэмэгдэх, ааш зан нь араатан мэт болох зэргээр хар тамхины хэрэглэгч болох, борлуулагчаар сүлжээнд орсон хойно нь мэдсэн тохиолдол их байна. Иймд эцэг эх, асран хамгаалагч, боловсролын байгууллагынхан урьдчилан сэргийлэх зорилгоор ЦЕГ-аас “Анзаар” нэгдсэн ажлыг зохион байгуулж байна. Мансууруулах сэтгэцэд нөлөөлөх эм, бодисын хэрэглээтэй холбоотой мэргэжлийн зөвлөгөөг 116 утсаар үнэ төлбөргүй авч болно. Мөн сэтгэцийн эрүүл мэндийн талаарх зөвлөгөөг 1800-2000 дугаарын утсаар холбогдоход мэргэжлийн байгууллагын зөвлөгөө өгч байгаа юм.