Пүрэв гарат болсон аймгийн ИТХ-ын ээлжит хуралдаанаар “Хот тохижуулах газар, Цэцэрлэгжүүлэлт ногоон байгууламжийн газрын бүтэц, орон тоо, цалингийн зэрэглэлийг шинэчлэн батлах тухай” гэсэн асуудлыг авч хэлэлцсэн юм. Долоодугаар сарын 8-нд хуралдсан аймгийн ИТХ-ын ээлжит хуралдаанаар дээрх 2 байгууллагын төсөвт тодотгол хийсэн бол энэ удаад бүтэц, орон тоог хэлэлцэж баталсан юм.

Хот тохижуулах газрын хувьд бүтэц орон тоо, цалингийн зэрэглэлээ батлуулснаар 279 хүний орон тоотой ажиллахаар болж байгаа юм. Энэ үеэр аймгийн ИТХ-ын зарим төлөөлөгч хэлэлцэж буй асуудалтай холбогдуулан байр сууриа илэрхийлсэн юм. Түүний нэг нь аймгийн ИТХ-ын төлөөлөгч, аймгийн ИТХ дахь АН-ын бүлгийн дарга Д.Өсөхбаяр “Бүтэц, орон тоог чинь төлөөлөгчид батлаад өглөө. Сайн ажиллах хэрэгтэй байна. Мөнхдалай дарга аа, юунаас нь айгаад, гацаад байгаа юм бэ. Тэр био нойлуудаа 50, 60-аар нь оруулаад ирээч. Иргэдэд хэрэгтэй байна. Улсын баяр, наадмаар манай намын гэр болон аймгийн дарга нарын гэрийн ард нэг био нойл хийжээ. Баяр наадмаар хүмүүс сайхан айраг уудаг. Тэр жишгээр би жаахан айраг уусан.

Био нойл орох болтол бөөн дугаарлалт. Олон хүн урт дараалал үүсгэчихсэн. Аргаа бараад би уяачдын асрын ард байх био нойл руу нэлээн хэдэн удаа гүйлээ. Баярлаж хөөрсөн хүмүүс айраг цагаа ууна. Гэтэл наадмын талбай дээр нь хэдхэн тооны био нойл ажилладаг. Бөөн оочер дугаар. Энэ арай дэндэж байна. Ажлаа аваад багагүй хугацаа өнгөрсөн шүү. Одоо ажлаа хий л дээ” хэмээсэн юм.