Аймгийн ИТХ-ын ээлжит 16-р хуралдаан хуралдаж байна. Хуралдааны эхний асуудал хөдөө аж ахуйн өвөлжилтийн бэлтгэл ажлын талаарх танилцуулгыг аймгийн ХХААГ-ын дарга Ө.Бат-Өлзий танилцууллаа. 
      Орхон аймгийн “Хөдөө аж ахуйн салбарын 2023-2024 оны өвөлжилт, хаваржилтын бэлтгэл хангах ажлын төлөвлөгөөнд нийт 32 арга хэмжээг тусган  батлуулан хэрэгжүүлж байна. Өнөөдрийн байдлаар хэрэгжилт 85 хувьтай байгаа талаар мэдээллээ. 
2023 оны эхэнд нийт 169.9 мянган толгой мал тоологдсон бөгөөд судалгаагаар 43.8 мянган толгой малыг эдийн засгийн эргэлтэд оруулж, 178.9 мянган толгой мал өвөлжүүлж, хаваржуулах төлөв гарчээ. 
        Аймгийн болон Баян-Өндөр Жаргалант сумдын  аюулгүйн нөөцөд нийт 200 тонн өвс, 86 тонн тэжээл бэлтгэх ажээ. Мөн малчдын түвшинд 9500 тонн байгалийн хадлан бэлтгэнэ. Үүнээс хөрш зэргэлдээх аймаг, сумдын нутаг дэвсгэрээс 4500 тонн, өөрийн аймгийн нутаг дэвсгэрээс 5000 тонн бэлтгэхээс өнөөдрийн байдлаар 8.2 хувь буюу 783 тонн байгалийн хадлан бэлтгээд байна. 
        Энэ онд аймгийн хэмжээнд 14 аж ахуйн нэгж, 297 өрхөөс нийт  үр тариа 3904 га,  малын тэжээл 287 га, тосны ургамал 821 га, төмс 140 га, хүнсний ногоо 408 га талбайд нийт 5560 га талбайд ургац хураалтын ажил хийгдэх юм байна.