Эрдэнэт хот бол аранжин зэсийн өлгий гэж хэлж болно. 1970-аад оны үеэс Эрдэнэтийн зэс гэдэг үг, хэллэг монгол хэлний үгийн санд нэвтэрч улмаар нэлээн хүндтэй байр суурь эзлэх болсон. Тэр цагаас хойш 50 шахам жил өнгөрч байгаа ч Эрдэнэт хот аранжин зэс хоёрыг салгаж, ялган ойлгохын аргагүй болжээ.

Өнөөдөр Амарын талбай аранжин зэсийн өнгөөр туяарч зэс олборлогчид, баялаг бүтээгчид, зэсээр бүтээл урладаг урлан бүтээгчдийн хөлд дарагдав. Орхон аймгийн ЗДТГ-аас санаачлан энэ сарын 22-23-нд Амарын талбайд “Зэс фестиваль” эвент арга хэмжээг зохион байгуулж байна. Энэхүү арга хэмжээний зорилго нь Монгол улсын Засгийн газраас Монголд зочлох жил болгон зарласантай  холбогдуулан Орхон аймаг, Эрдэнэт хотын онцлогийг илэрхийлсэн эвент зохион байгуулах, уул уурхайн салбарыг сурталчлахад оршиж байгаа аж. Нэг үгээр хэлбэл, гадаадын гэлтгүй дотоодын жуулчид Эрдэнэтээс л зэсээр урласан, урлаж болох бүхнийг авах боломжийг олгож байгаа юм.

“Зэс фестиваль” бага үдийн алдад “Эрдэнэт үйлдвэр” ТӨҮГ, “Эрдмин” ХХК, “Ачит Ихт” ХХК, “Зэс эрдэнийн хувь” ХХК, “Гал сэнтий” ХХК-ийн уурхайчдын жагсаал Энх тайвны өргөн чөлөөгөөр алхсаар Амарын талбайд орж ирснээр эхэлсэн юм.

Энэ удаагйин “Зэс фестиваль” эвент арга хэмжээг Орхон аймгийн ЗДТГ, аймгийн БОАЖГ-аас санаачлан “Эрдэнэт үйлдвэр” ТӨҮГ, “Эрдмин” ХХК, “Ачит Ихт” ХХК, “Зэс эрдэнийн хувь” ХХК, “Гал сэнтий” ХХК-иудын хамтаар зохион байгуулж байгаа билээ. Зохион байгуулагчдын зүгээс “Зэс фестиваль” эвент арга хэмжээг жил бүр уламжлал болгон хийж байхаар төлөвлөж байгаа агаад жилээс жилд арга хэмжээ өргөжин тэлж Орхон аймаг, Эрдэнэт хотын нэрийн хуудас бүхий томоохон ажил болох юм. “Зэс фестиваль” эвент арга хэмжээнд хүндэт зочноор БОАЖ-ын сайд Б.Бат-Эрдэнэ, УИХ-ын гишүүн Д.Батлут, аймгийн ИТХ-ын дарга Д.Мөнхбат, ОХУ-ын ЭСЯ-ны төлөөлөл болон гадаад дотоодын жуулчид өргөнөөр оролцлоо. Аранжин зэсийн өлгий Эрдэнэт хотод тавтай морил.