Орхон аймгийн МАН-ын хорооны Тэргүүлэгч, аймгийн МАН-ын дэргэдэх Социал демократ эмэгтэйчүүдийн холбооны тэргүүн, Хот тохижуулах газрын дарга Б.Оюунбаяр ажил албан тушаалаа урвуулан ашиглаж улсад их хэмжээний хохирол учруулсан хэргээр Шүүхээс ял сонссон. БОАЖЯ-наас манай аймагт агаарын бохирдлыг бууруулах, ойн нөхөн сэргээлт хийх зориулалтаар олгосон 1 тэрбум төгрөгийн ажлыг Хот тохижуулах газраар хийж гүйцэтгүүлэхээр шийдвэрлэсэн. Үүний дагуу аймгийн Засаг дарга эрх шилжүүлж тодорхой хэмжээний мөнгийг захиран зарцуулах эрхийг Хот тохижуулах газрын дарга Б.Оюунбаярт олгосон. Уншигч та санаж байгаа бол 2022 оны өдийд аймгийн хэмжээний төрийн байгууллагын ажилчдыг дайчилгаа зарлан Хогийн жалга орчмын хог цэвэрлэгээ хийх ажилд дайчилсан. Хоёроос гурав хоног ажилласан төрийн байгууллагынхан төсвөөс нэг төгрөгийн ч цалин урамшуулал аваагүй. Тэр бүү хэл, хог түүх бээлий ч төсвөөс олгоогүй. Гагцхүү тэр ажилд зарцуулах мөнгийг эрх мэдэлтэй албан тушаалтнууд хувьдаа ашигласан нь шүүхээр тогтоогдсон байдаг.

Шүүхийн шийдвэр, тогтоолоос харвал 140 гаруй сая төгрөгийг хувьдаа завшиж улсад их хэмжээний хохирол учруулсан тул Хот тохижуулах газрын дарга асан Б.Оюунбаярт шүүхээс нийтийн албанд ажиллах эрхийг нь 2 жилээр хасч, 25 сая төгрөгөөр торгосон. Торгуулийн 25 сая төгрөгийг 3 жилийн хугацаанд төлж барагдуулахыг үүрэг болгохын зэрэгцээ өмнө авагдсан хилийн хоригийг нь цуцлах шийдвэр гаргасан байдаг.

Аймгийн ИТХ-аас Б.Оюунбаярын төлөөлөгчийн бүрэн эрхийг дуусгавар болгосон. Энэ үеэс л эхлэн түүнийг тойрсон шүүх, мөнгө хөрөнгөтэй холбоотой мэдээлэл гарсан. Өмнө нь бол энэ асуудал “маш нууц” байлаа. Одоо аймгийн МАН-ын хороо шүүхээр асуудал нь нэгэнт шийдэгдсэн гишүүнтэйгээ хариуцлага тооцох л үлдсэн баймаар. Гэтэл одоог болтол таг чиг.  Саяхан, МАН-ын Хяналтын ерөнхий хорооны дарга Б.Баярбаатар Булган аймагт ажилласан.  Түүний мэдээллээс харвал “ажил албан тушаалын болон авлигын гэмт хэрэгт холбогдсон, улмаар шүүхээс ял шийтгэл авсан МАН-ын гишүүн, албан тушаалтныг намаас хөөж байгаа, хөөх ч болно” гэсэн ярилцлага өгч байсан. Б.Баярбаатар даргын алсын хараа, мэлмий нь манай аймагт хүрч чадахаа байсан уу. Аль эсвэл манайхан асуудлыг нуун дарагдуулаад байна уу. Хам хэрэгтнүүд л нэгнийхээ хэргийг нуун дарагдуулдаг, хаацайлдаг байх. Түүнээс биш манай аймгийн МАН-ын хэдэн зуун гишүүний хувьд бүгд асуудалд орж, шүүхээс ял сонсоогүй. Аймгийн МАН-ын гишүүд ч энэ асуудалд байр сууриа илэрхийлж, хариуцлага тооцохыг яагаад шаардахгүй байна вэ. Нөгөө талаар асуудал ганцхан Б.Оюунбаяр гэдэг хүндээ биш л дээ. МАН-ын дарга Л.Оюун-Эрдэнэ, Ерөнхий нарийн бичгийн дарга Амарбаясгалан нар ч авлига, албан тушаалтны хэрэгтэй хатуу тэмцэхээ илэрхийлсээр байхад аймгийн МАН-ын хороо таг дүлий байх нь юуны учир вэ.

Ингэхэд ирэх пүрэв, баасан гарагт Монгол Улсын Ерөнхий сайд, МАН-ын дарга Л.Оюун-Эрдэнэ Орхон аймагт ажиллана. Намын дарга, улсын Ерөнхий сайд нь 21 аймгаа тойрч иргэдээ сонсч, намын гишүүдийнхээ орон нутгаа хэр удирдаж буйг харах гэж ирнэ. Энэ үед албан тушаалаа ашиглан улсад хохирол учруулж, шүүхээс ял сонссон гишүүдийнхээ толгойг илж, гадаадад томилолтоор ажиллуулсаар байгаа Орхон аймгийн МАН-ын хороог хэрхэн үнэлэх бол гэдгийг эрдэнэтчүүд хүлээж байна.