Ерөнхий боловсролын “Маргад” сургуулийн 2022-2023 оны хичээлийн шинэ жилийн нээлт боллоо. Тус сургуулийн нэгдүгээр ангид 16 сурагч элсэн оржээ. Ерөнхий боловсролын “Маргад” сургуулийн хувьд Японы улсын боловсролын байгууллага, багш, мэргэжилтэн нартай хамтран ажилладаг ажээ. Энэ хичээлийн жилд нэгдүгээр ангид элсэн орж байгаа сурагчдын хувьд Япон улсын сургалтын хамгийн гол онцлог  ноу- хау-гийн нэг болсон Токацу хичээлийг нэгдүгээр ангиас эхлэн заах гэнэ.

Боловсрол судлалын магистр, заах аргач Д.Цэцэгтогтох багштай 1А ангийнхан өглөө 8.30-аас 17.00 цаг хүртэл хичээллэнэ. Нэгдүгээр ангийн сурагчид өдөр өнжүүлэх бүлэгт хамрагдсан нь эцэг эхчүүдийн хувьд таатай хэрэг болжээ. Цар тахлын 2 жилийн хугацаанд сургуулийн сурагчид хэдийгээр цахим хичээлд бүрэн хамрагдаж байсан ч авах ёстой, мэдлэг, боловсролынхоо 70 хувийг л авч чадаж байжээ. Иймээс “Маргад” ЕБС-ийн захиргаа энэ хичээлийн жилд сурагчдын сурлагын чанарыг илүү дээшлүүэх чиглэлд анхаарч ажиллах болсон байна.

Тус сургуулийн Боловсролын тэргүүний ажилтан, Зөвлөх багш Г.Болормаагийн удирдсан 4А ангийнхан 17 сурагчтай хичээлийн шинэ жилээ эхлүүлж байна. Тэд хичээлийн шинэ жилийн эхний өдөр ч гэсэн өглөө ангидаа ирсэн даруйдаа сурсан зангаараа ангийнхаа номын сангаас дуртай номоо авч 15 минутын турш уншиж дараа нь зохион бичлэг хийлээ. Зохион бичлэгтэйгээ холбоотой зураг зураад амжсан. Зөвлөх зэрэгтэй багш Г.Болормаа ангийнхаа сурагчдыг ийнхүү өдөр бүрийн дадалтай болгосноор сурагчид нь сууж сурсан, дээр нь зохион бичлэг хийдээ үг үсгийн алдаагүй бичдэг болсон байна. Ангийн багшийн зүгээс сурагчдынхаа зохион бичлэгийн дэвтрийг хадгалж, тавдугаар ангиа төгсөхөд нь эцэг эхэд нь хүлээлгэн өгөх гэнэ.