“Хангарьд” палас энэ өдрүүдэд хөгжөөн дэмжигчдийн болон үзэгчдийн хөлд дарагдаж, тэдний уухайн дуу тэнгэрт ч сонсдохоор цуурайтаж байх шиг. Уурхайчдын спортын их наадам болж байгаа Эрдэнэт хот ч уурхайчин-тамирчдын хөлд дарагдан, Амарын талбай, Энх тайвны өргөн чөлөө хөл хөдөлгөөн ихтэй байлаа.

Сагсан бөмбөгийн тэмцээний шөвгийн дөрвөн багийг тодруулах тоглолтууд үнэхээр “гал гарсан”, хөгжөөн дэмжигчдийн цөсийг хөөргөсөн тоглолт болж аваргын алтан медалийн төлөө Эрдэнэтийн хоёр баг буюу “Эрдэнэт үйлдвэр” ТӨҮГ-ийн баг “Ачит Ихт” компанийн сагсан бөмбөгчид шалгараад байгаа. Энэ хоёр баг аваргын төлөө тоглох эрхээ тийм ч  амархан авчихаагүй. Ялангуяа “Эрдэнэт үйлдвэр” ТӨҮГ-ийн “Эрдэнэт” баг “Багнуур” багтай ач тач үзэлцэж, тооны харьцаа ойрхон, өгөө аваатай явж байгаад эцсийн мөчид ялалт байгуулсан.

Тоглолтын уур амьсгал талаас нь харвал “Багануур”-ын хөгжөөн дэмжигчид үнэхээр халуун байлаа. Багийн тамирчдад урам өгөх, оноо болсон довтолгоо бүрийг уухайн дуугаар түрж, алга ташилтаар шагнаж байх тэр мөчид “Эрдэнэт” багийн фэнүүд ч зүгээр байсангүй. “Багануур”-ын хөгжөөн дэмжигчид тамирчдаа уухайлан “Багануур, Багануур” хэмээн дуугаа нэгтгэн уухайлахад харин “Эрдэнэт” багийн хөгжөөн дэмжигчид жаахан бүдүүлэг зан гаргасан. Тэд “Багануур, Багануур” хэмээн уухайлж байгаа хөгжөөн дэмжигчдийнх нь өөдөөс “Гэртээ харь” хэмээн бахирч байгаа нь үнэхээр таалагдсангүй. Уурхайчдын спортын их наадам ганцхан удаа болоод өнгөрөхгүй. Магадгүй хэдэн жилийн дараа энэ наадам “Багануур” хотод ч юм уу аль эсвэл Өмнөговийн Ханбогдод болоход “Эрдэнэт” багийнханыг “Гэртээ харь” гээд хашхираад байвал яах бол.

Эндээс харвал хөнжөөн дэмжигчдэд ч гэсэн Соёл хэрэгтэй санагдсаныг нуух юун. Спорт бол эв найрамдлын бэлэг тэмдэг. Хүн төрөлхтөн дөрвөн жилд нэг удаа болдог Олимпийн их наадмыг тэсэн ядан хүлээдэг. Таван тивийн улс бүрийн төлөөлөл оролцсон өвөл, зуны олимп нь таван цагаригийн дор нэгдсэн тамирчин, дасгалжуулагч, хөгжөөн дэмжигчдийн хүсэн хүлээсэн наадам болдог. Энэ үед хөгжөөн дэмжигчид багаа дэмжихээс гадна, өрсөлдөгчдийг нь ч хайрлаж, хүндэлдэг тэрхүү агуу соёлд суралцах хэрэгтэй. Монголын уран сайхны кинонд гардаг шиг “Наадам нэгээр дуусахгүй шүү” гэдэгчлэн уурхайчдын наадам ч дахин болно. Тиймээс нэгийг бодож, хоёрын тунгаан хөгжөөн дэмжигчдээ соёлд сургах цаг иржээ, бидэнд. Тэгээд ч энэ цаг үед манай аймагт “Соёлын түгээе” аян нээлтээ хийж “Хувийн соёл-Байгууллагын соёл-Хотын соёл” уриатайгаар өрнөж байгаа цаг үеэ бодсон ч хөгжөөн дэмжигчдийг соёлд сургах нь эхний ажил ч байж мэдэх юм.

2022-11-21.