2022 оны долоодугаар сарын 5-нд Төрийн албаны тухай хуульд нэмэлт өөрчлөлт орж, төрийн албаны ерөнхий шалгалтыг улиралд нэгээс доошгүй удаа зохион байгуулж байх зохицуулалтыг тусгасан.  Төрийн албаны зөвлөлөөс 2023 онд төрийн албаны нөөц бүрдүүлэх ерөнхий шалгалтыг хуваарийн дагуу дөрвөн удаа зохион байгуулахаар тогтож, хугацааг товлон нийтэд зарлан мэдээлсэн билээ.  
Энэ оны эхний шалгалтын бүртгэл хоёрдугаар  сарын 1-нээс  эхэлсэн бөгөөд  ирэх гуравдугаар сарын 1 хүртэл  https://exam.csc.gov.mn/ цахим хаягаар үргэлжилж байна. 
Өнөөдрийн  байдлаар 52 иргэн шалгалтад оролцохоор бүртгүүлжээ.

ТӨРИЙН АЛБАНЫ ЕРӨНХИЙ ШАЛГАЛТЫН ТОВ

- I улирлын шалгалтын бүртгэл 2023.02.01-2023.03.01 хүртэл үргэлжилнэ. Шалгалтыг 2023.03.15-нд,
- II улирлын шалгалтын бүртгэл 2023.04.19-2023.05.04 хүртэл үргэлжилнэ. Шалгалтыг 2023.05.24-нд,
- III улирлын шалгалтын бүртгэл 2023.08.16-2023.08.31 хүртэл үргэлжилнэ. Шалгалтыг 2023.09.20-нд,
- IV улирлын шалгалтын бүртгэл 2023.10.18-2023.11.02 хүртэл үргэлжилнэ. Шалгалтыг 2023.11.22-нд авна.
 Засгийн газраас “Төрийн улс төрийн албан тушаалд ажилласан хугацааг төрийн захиргааны албан  тушаалын зохих ангилалд ажилласан хугацаанд дүйцүүлэн тооцох журам”-ыг баталсан. 

Ингэснээр улс төрийн албан тушаалаас төрийн захиргааны албан тушаалд шилжин ажиллах хүсэлтэй иргэд ерөнхий шалгалтаар нөөцөд бүртгэгдэж, тусгай шалгалтад өрсөлдөн төрийн захиргааны албан тушаалд шилжин ажиллах боломжтой болжээ. Төрийн албаны ерөнхий шалгалтыг төрийн албанд ажиллах иргэдийн нөөцийг бүрдүүлэх зорилгоор 2019 оноос эхлэн зохион  байгуулж байна.  

      Орхон аймгийн хувьд төрийн албаны ерөнхий шалгалтад 2019 онд 42, 2020 онд 122, 2021 онд 156, 2022 онд 93 хүн тэнцэж нөөцөд бүртгэгджээ. Эдгээр иргэдээс өнгөрсөн онд 39 иргэн тусгай шалгалт өгч төрийн албанд орж ажилласан байна.

Цаашид төрийн тусгай, төрийн үйлчиилгээний зарим удирдах албан тушаалыг төрийн захиргааны албан тушаалтай адилтгах жагсаалт батлагдахтай холбогдуулан дээрх албан хаагчид болон төрийн албанд ажиллах хүсэлтэй нийт иргэдийг төрийн албаны ерөнхий шалгалтын  бүртгэлээ баталгаажуулж амжилттай оролцохыг урьж байна. 
2021 онд 85 сул орон тоог нөхөхөөр 11 удаа тусгай шалгалт зохион байгуулж 69 нөхөгдсөн бол 2022 онд 115 сул орон тоог нөхөхөөр 24 удаа тусгай шалгалт зохион  байгуулж 91 сул орон тоо нөхөгдсөн оролцогчдыг нэр дэвшүүлэн тухайн байгууллагуудад томилжээ.