Улсын төсвийн хөрөнгө оруулалтаар Орхон аймагт баригдаж байгаа ерөнхий боловсролын наймдугаар сургууль, гуравдугаар сургуулийн барилгын ажилтай орон нутгийн удирдлагууд танилцлаа. 
      Орхон аймгийн ууган сургууль болох гуравдугаар сургуулийн хичээлийн 1-р байрыг буулгаж шинээр спорт заалны хамт 960 хүүхдийн багтаамжтай сургууль барих ажил өнгөрсөн онд эхэлсэн. Нийт 4 блок барилга баригдахаас өнөөдрийн байдлаар хоёр блокны суурин ажил хийгдэж, нэг блокийн зоорийн давхар бүрэн дуусч, С блокын суурийн ажил хийгдэж, ажил 19 хувьтай явж байна. Сургуулийн барилгын ажилд нийт 7,9 тэрбум төгрөг төсөвлөгджээ. 

      Лаборатори 8-р сургуулийн өргөтгөлийн барилгын ажил 25 хувьтай байна. Өргөтгөлийн барилга нь 320 хүүхдийн багтаамжтай бөгөөд гадна тохижилт, хөл бөмбөгийн талбай зэрэг хийгдэх ажээ. Зоорин давхартайгаа нийт 3 давхар барилгын ажлын гүйцэтгэгчээр “Хөх тавилан” ХХК ажиллаж байгаа юм. Тус сургууль нь анги танхимын хүрэлцээгүй болж, гурван ээлжээр хичээллэх, хичээлийн бус цагаар сурагчдыг хөгжүүлэх нэмэлт хичээл явуулахад зориулан коридорын хэсгүүдийг битүүлэн анги танхим, болгон ашиглах нөхцөл үүсээд байгаа юм. өртгөлийн барилгын ажил ирэх 2024 онд ашиглалтад орно.