Баасан гарагийн ажил хаялт баахан асуудлыг Эрдэнэтэд үүсгэж мэдэх вий дээ. Манайхан нуухыг нь авах гэж байгаад нүдийг нь сохолчих хэмжээний асуудал үүсгэв үү яав гэсэн хардалт төрөөд эхэлснийг нуух юун. “Эрдэнэт үйлдвэр” ТӨҮГ, тус байгууллагын ажилтнуудын эрх ашгийг хамгаалдаг үйлдвэрийн дэргэдэх Үйлдвэрчний хороо хоёрын хооронд байгуулдаг “Хамтын гэрээ” өнгөрөгч үйл явдлаас хойш олны анхаарлын төвд орсон. Төвийн хэвлэл мэдээллээр энэ тухай шуугиад л цахим орчинд энд тэндгүй лайвдаад л.

Асуудлын гол нь “Цалинг 50 хувь нэм” хэмээн шаардаж байгаа ч хэдэн хүний цалинг 50 хувь нэмэх гаад байгаа юм бэ. Үйлдвэрт яг хэдэн хүн уурхайчнаар ажилладаг вэ, даргын нарийн бичгийн цалин дагаад 50 хувь нэмэгдэх үү гээд араасаа олон асуудлыг дагуулж эхэлсэн бололтой.

Үйлдвэрийн ажилчдын цалингийн нэмэгдлийн тухай асуудал  Засгийн газрын хэрэг эрхлэх газрын дарга Д.Амарбаясгаланг зургаадугаар сард Эрдэнэт үйлдвэрт ажиллахад ч яригдсан сэдэв. “Эрдэнэт үйлдвэр”-ийн толгой компани болох “Эрдэнэс Монгол” ХХК-ийн гүйцэтгэх захирал С.Наранцогт ч энэ намар Эрдэнэтэд ажилласан. Хамгийн сүүлд Сангийн яамныхан тус үйлдвэрт ажилласан байдгийм. Тухай бүрд нь “Хамтын гэрээ”-ний цалинг нэмэх тухай асуудал яригдаж, гарц гаргалгааны талаар ч эхний саналууд гарч байжээ. Тухай тухай бүрд цалингийн нэмэгдлийн тухай яригдахад “Уурхайчдын цалинг нэмэхэд татгалзах зүйл алга. Гэхдээ ямар ч тохиолдолд 50 хувиар нэмнэ гэсэн ойлголт байхгүй. Уурхайн гүнд ажиллаж байгаа, баялаг бүтээж байгаа яг хэдэн уурхайчин байдаг вэ. Үүнийг судлая. Нөгөө талдаа ниймийн цехүүдийнхээ талаарх байр суурийг эргэж харъя. Байх шаардлагтай юу. Зарим нийгмийн цехээ хувийн хэвшлээр гүйцэтгүүлэх гээд олон гаргалгаа бий. Үүнийг судлах хэрэгтэй. Дээр нь цалинг нэмэх гэж байгаа бол бүтээмжээ нэмэгдүүл” гэсэн шаардлагууд гарч байсныг албан бус шугамаар дуулдаж байсан удаатай. Мордохын хазгай л гэгч болчих вий. Бүгдээрээ цалингаа 50 хувиар нэмэгдүүл гээд шаардаад байтал зоосны нөгөө талд үйлдвэрийн нийгмийн цехүүдэд ажилладаг 1500 гаруй ажилтны ажлын байрны асуудал босч ирэхийг үгүйсгэх аргагүй. Сангийн яам өнөөдөртөө Монгол улсын нутаг дэвсгэрийн хэмжээнд эргэлдэж байдаг мөнгөн гүйлгээг хянахын зэрэгцээ зарцуулдаг гэдгийг хэн хүнгүй мэднэ. Сангийн яамны хувьд төрийн байгууллагын орон тоо стандарт хэмжээнд байх, Монгол улсын төсвийг алдагдалгүй байлгах хамгийн гол үүрэгтэй. Яам тэр талаас нь хараад эхлэвэл дахиад л үйлдвэрчнийхэн ажил хаялт зарлана гэх үү. Эсвэл нөгөө талаас нь харвал ажил хаялтын зорилго үйлдвэрийн нийгмийн цехүүд рүү чиглэсэн үү гээд олон эмзэг сэдвийг хөндөж мэдэхээр байна. Өөрөөр хэлбэл, нэг үхрийн эвэр доргивол мянган үхрийн эвэр доргидог гэдэг шүү дээ. Иймээс асуудлыг мугуйдлан дайрах биш хэлэлцээрийн ширээний ард сууж хурлын дэгээ баримтлан хамгийн гол нь талууд бие биеэ хүндэтгэн ярилцахад оршиж байна. Монголын үйлдвэрчний эвлэлийн байр суурийг харвал зөвхөн уурхайчдын цалинг 30-50 хувь нэмэхийг дэмжиж байна гэсэн шүү. Энэ бас нэгийг хэлээд байгаа бус уу.