Монгол улсын Ерөнхий сайд Л.Оюун-Эрдэнэ өнгөрөгч зургаадугаар сарын эхээр “Tesla, SpaceX” компаниудын гүйцэтгэх захирал Илон Масктай цахим уулзалт хийсэн билээ. Энэ үеэр Монгол улсын зүгээс цахилгаан автомашины чухал түүхий эд болох зэс, газрын ховор элементээр баялаг манай орны хувьд “Tesla”-гийн цахилгаан автомашины аккумляторын үйлдвэрийг байгуулах боломжтой талаар ярилцсан тухай дэлхий шуугиж байсан билээ. Тэрхүү зэс нь тэр дундаа 99.999 хувийн сорьцтой цэвэр зэсийг Эрдэнэтд л үйлдвэрлэж байгаа билээ.

Өнөө, маргааш хоёр өдөр болох “Зэс фестиваль” эвент арга хэмээнд Монгол улсад цахилгаан автомашин импортлогч зарим компани оролцсон юм. Тэдний хувьд зэсийн өлгий нутаг болох Эрдэнэт хотын иргэдэд БНХАУ-д үйлдвэрлэсэн цахилгаан автомашиныг сонирхуулж, бүр зарим нэг 0 /тэг/ км-ийн гүйлттэй машиныг санал болгож байлаа. 48-250 сая төгрөгийн үнэтэй нэлээн хэдэн төрлийн загвар хийцтэй цахилгаан автомашиныг Амарын талбайд хүрэлцэн ирсэн хүн бүхэн сонирхож шагшин магтаж байв.

Автомашины ирээдүй цахилгаан болж байгаа энэ зуунд хүн бүхний хэрэглээ тэр зүгт чиглэж байгаа юм. Нэг удаагийн цэнэглэлтээр 300-650 км замыг туулах боломжтой цахилгаан автомашинтай болсноор та бусдаас давуу эрхтэй болно. Тухайлбал, цахилгаан автомашинд ногоон дугаар олгоно, Улаанбаатарт нэгдүгээр эгнээгээр явна гээд л бод. Дээр нь дугаарын хязгаарлалт үйлчлэхгүй. Эрдэнэтэд ч цахилгаан автомашин цэнэглэх 2 ч төхөөрөмж бий. Энэхүү цахилгаан автомашиныг үйлдвэрлэхэд зэс хамгийн гол түүхий эдийн нэг төдийгүй Эрдэнэтэд хамгийн элбэг байдаг эд. Бүрэн цахилгаан машинд 83 кг, бүрэн цахилгаан автобусанд 224-369 кг цэвэр зэс ордог юм байна.