[sgmb id="1"]           Д.Соёлчхүү дарга аа, таны өнөөх зарчимч хатуу, чанга шаардлага сүүлийн үед яасан их үгүйлэгдэнэ вэ. Шувууд буцаж, навчис шарлаж уйтай намрын өнгө орсон энэ цагт дарга нарын тавьдаг зарчимч шаардлага цагийн аясаар эрч нь суларч, өнгө нь гандаж сүүлдээ бүр амтгүй хоол шиг болов уу гэж асуухад өөрийн эрхгүй хүрлээ. Уг нь цагтаа та аймгийн Засаг даргын Тамгын газрын даргын зангарагаар хэлтэс, алба, агентлагийн дарга нарт хатуухан шаардлага тавьж түүнийгээ биелүүлэхийг нэхэл хатуутай шаарддаг байсан. Түүний нэг нь төрийн байгууллагын дарга нарыг төрийн албаны стандарт, хэм хэмжээг баримтлахыг нэхэл хатуутай шахан шаардаж байсан билээ. Аймгийн Засаг даргын шуурхай дээр агентлаг, хэлтэс, албадын дарга нар төрийн албаны стандартын дагуу хувцас өмсөж байхыг үүрэгдсэн. Үүний тулд “Монгол шуудан”-гийн дарга Алтаншагайг эрээн цамц өмсөж ирсэн учраас шуурхай дээрээс хөөж, дахин ийм асуудал гаргахгүй байхыг сануулж байсан удаатай. Харин тэр цагаас хойш мөнөөх Алтаншагай дарга дориун гэгч нь хүмүүжиж өнөөдрийг хүртэл костюм  пиджакнаас салахаа байсан. Мөн зарим дарга нар гудамжинд салхилж яваа мэт эрээн цамц жинсэн өмднөөсөө татгалзаж ямар ч байсан долоо хоногт нэг удаа болдог Засаг даргын шуурхай дээр зангиа зүүхгүй ч гэсэн гоонж өмсдөг байсан нь саяхан. Эмэгтэй дарга нарын хувьд ч эрээн мяраан, хурц тод  өнгийн хувцас өмсөхгүй албан ёсны байдлаар хувцаслахыг үүрэгдэж билээ. Гэтэл сүүлийн үед Засаг даргын шуурхай дээр ирж байгаа дарга нарыг харвал зуны амралтнаасаа салаагүй шахам богино эрээн цамцаар гоёж, бариу жийнс жийж босоо хүлээн авалтад оролцох гэж байгаа мэт хувцаслах нь хэрээс хэтэрсэн байна. Эмэгтэйчүүдийн хувьд ч тэр, лангууны ард зогсож буй худалдагчаас ялгаагүй ноосон цамцаар “жигдэрч” шуурхайд биш салхинд зугаацаж яваа мэт сэтгэгдэл төрүүлэхээр болжээ. Бүр сүүлдээ энд тэндхийн агентлаг, хэлтсийн дарга нарыг эзгүй хойгуур нь орлон ирж байгаа нөхдүүд биеийн тамирын хувцас, бариу цамц энэ тэрээр “гангарсан” байгааг ажвал Шуурхайд биш харин эсрэгээрээ аймгийн Засаг дарга иргэдтэй уулзалт хийж байгаа мэт харагдаж байна. Эдүүгээгээс найман зууны тэртээ их эзэн Богд Чингис хаан албатууддаа “Тангуд улс мөхөөгүй гэдгийг  өглөө бүр сануулж бай” хэмээн захиж байсанчлан Соёлчхүү дарга та хэлтэс, агентлагын дарга нартаа ядаж л сард нэг удаа төрийн албаны стандартын дагуу хувцаслахыг сануулахгүй бол нэг л биш ээ.