Баян-Өндөр сумын ЗДТГ-аас Сум хөгжүүлэх сангийн зээлийн эргэн төлөлтийг сайжруулах талаар багагүй ажил зохион байгуулжээ. Энэ ажлын хүрээнд өмнө нь зээл авсан боловч зээлийн эргэн төлөлтийн хувьд хүндрэл үүсгэсэн, зээлээ төлөөгүй иргэн, аж ахуй нэгжийн удирдлагатай уулзаж харилцан тохиролцож тэдэнд гэрээний хугацааг нь сунгах зэргээр боломжит арга хэмжээ авч байгаа аж. Гэсэн хэдий ч өнөөдрийн байдлаар 31 иргэн, аж ахуйн нэгжтэй холбоотой 150 гаруй сая төгрөгийн зээлийн эзэн холбогдогч олдохгүй байгаа гэнэ. Сумын Засаг дарга С.Ганцогтын тайлбараар бол 150 гаруй сая төгрөгийн энэхүү зээл нь нэр бүхий 31 иргэн аж ахуйн нэгжид зориулалтын журмаар олгогдоогүй бололтой. Ямар ч байсан Баян-Өндөр сумын зүгээс 2013 оноос хойш олгогдоод өнөөдрийг болтол олдохгүй байгаа 150 гаруй сая төгрөгнийхөө араас нөхөн төлүүлэх чиглэлээр хууль хяналтын байгууллагад хандах хүртэл арга хэмжээ авахаар төлөвлөж байгаа аж. Энэ оны байдлаар Баян-Өндөр сумын Сум хөгжүүлэх сангаас 970 гаруй сая төгрөгийн зээл олгосон байна. Энэ зээл иргэнд 5 сая, аж ахуйн нэгжид 10 сая хүртэлх төгрөгийн хэмжээтэй олгодог байна.