[sgmb id="1"] Нээлттэй Нийгэм Форум (ННФ)-оос Төсвийн ил тод, хариуцлагатай байдлыг дээшлүүлэх чиглэлээр хамтран ажилладаг иргэний нийгмийн байгууллагуудын зөвлөгөөнийг 2017 оны 11 дүгээр сарын 21-23- ны өдрүүдэд зохион байгууллаа. Зөвлөгөөнд оролцсон иргэний нийгмийнхэн аймаг, нийслэл, дүүргүүдийн төсөв, санхүү, худалдан авалтын ил тод байдлын өнөөгийн түвшин болон, төсөв, түүний зарцуулалт ил болох нь төсвийн хариуцлагыг нэмэгдүүлэхэд бодит нөлөө үзүүлж буй эсэх талаар ярилцаж төсвийн хариуцлагыг дээшлүүлэх чиглэлээр ирэх хоёр жилд явуулах үйл ажиллаганы төлөвлөлтөө хийлээ. Тэрчлэн төсвийн мэдээлэл цуглуулж боловсруулах арга зүй, орон нутагт иргэний хяналт хэрэгжүүлдэг олон улсын туршлага, Нийтийн сонсголын тухай хуулийн хүрээнд төсвийн хяналтын сонсгол хийх, нийтийн эрх ашгийг шүүхээр нэхэмжлэн хамгаалах боломжийн талаар мэдээлэл солилцож, харилцан туршлага судалсан юм. Зөвлөгөөнд оролцсон иргэний нийгмийн байгууллагууд нь Нээлттэй нийгэм форумын дэмжлэгтэйгээр Шилэн дансны тухай хууль хэрэгжиж эхэлсэн эхний өдрөөс эхлэн нийт аймаг, нийслэл, дүүргүүдийн хэмжээнд зургаан сарын туршид тасралтгүй хяналт тавьж байсан байна. 2016 оны сонгуулийн дараа хуулийн хэрэгжилт саарч эхэлсэн тул 2016 оны сүүлээс эхлэн 2017 оны эхний хагас жил хүртэл дахин мониторинг хийсэн юм. Энэхүү ажиглалтын дүнгээс үзэхэд цалингаас бусад таван сая төгрөгөөс дээш дүнтэй худалдан авалт, гүйлгээний мэдээллийг бүрэн гүйцэд ил тод болгох байдал хангалтгүй хэвээр байгаа бөгөөд зарим талаар ухралт гарч эхэлсэн байна. Тухайлбал, 2017 оны тавдугаар сард Баян-Өлгий, Булган, Дархан-Уул, Орхон, Сэлэнгэ аймгийн ЗДТГ-ууд таван саяас дээш төгрөгийн худалдан авалт, гүйлгээний мэдээллээ 100 хувь ил тод болгожээ. Гэвч энэ оны арваннэгдүгээр сарын эцсийн байдлаар авч үзэхэд дээрх аймгууд таван саяас дээш төгрөгийн худалдан авалт, гүйлгээний мэдээллээ хагас дутуу оруулдаг болжээ.