Аймгийн ИТХ-ын Тэргүүлэгчдийн ээлжит гуравдугаар хуралдаан болов. Хуралдаанд аймгийн ИТХ-ын дарга П.Пүрэвлхагва, Тэргүүлэгч Д.Бүүвэйбаатар, А.Түвшинжаргал, С.Батжаргал, Д.Эрдэнэбат, И.Баасанжав нар оролцсон юм. Энэ удаагийн Тэргүүлэгчдийн хуралдаанаар дараахь асуудлыг хэлэлцлээ. Үүнд, 1-д Хуралдаан зарлах тухай 2-д Шагналд тодорхойлох тухай гэсэн асуудал багтсан юм. “Аймгийн ИТХ-ын ээлжит X хуралдааныг 2018 оны хоёрдугаар сарын 23-нд хуралдуулж өгнө үү” гэсэн саналыг аймгийн Засаг дарга Д.Батлутын зүгээс гаргасан байна. Ээлжит X хуралдаанаар аймгийн Засаг даргын зүгээс 1-д Шилжих үлдэгдлээс зарцуулах хөрөнгийн жагсаалт батлах тухай 2-д Аймгийн авто тээврийн талаар баримтлах 2018-2020 оны бодлого батлах саналыг Тэргүүлэгчдийн хуралдаанд оруулав. Тэргүүлэгчид аймгийн Засаг даргын гаргасан саналыг хэлэлцээд дэмжиж, аймгийн ИТХ-ын ээлжит X хуралдааныг 2018 оны хоёрдугаар сарын 23-нд хийхээр тогтлоо. Аймгийн ЗДТГ-ын зүгээс монгол түмний уламжлалт сар шинийн баярыг тохиолдуулан зарим иргэнийг төрийн дээд одон, медалиар шагнуулахаар холбогдох байгууллагуудаас ирүүлсэн саналыг үндэслэн аймгийн ИТХ-ын Тэргүүлэгчдийн хурлаар хэлэлцүүлэв. Энэ удаад Хөдөлмөрийн гавьяаны улаан тугийн одонгоор “Эрдэнэт үйлдвэр” ХХК-ийн Их барилгын хэлтсийн даргын зөвлөх Булгаагийн Алтанхуяг, “Эрдэнэт үйлдвэр” ХХК-ийн Хөдөлмөрийн аюулгүй байдал, эрүүл ахуй, байгаль орчныг хамгаалах хэлтсийн даргын зөвлөх Бямбын Баттайван нарыг “Эрдэнэт үйлдвэр” ХХК-ийн захиргаанаас тодорхойлжээ. Алтан гадас одонгоор “Эрдэнэт үйлдвэр” ХХК-ийн Хөдөлмөрийн аюулгүй байдал, эрүүл ахуй, байгаль орчныг хамгаалах хэлтсийн мэргэжилтэн Лувсанчүлтэмийн Батгэрэл, Авто тээврийн төвийн мэргэжилтэн Төмөрхуягийн Бадамсэрээжид нарын нэрийг “Эрдэнэт үйлдвэр” ХХК, Авто тээврийн төвөөс тодорхойлсон байна. Хөдөлмөрийн хүндэт медалиар нэгдүгээр сургуулийн эмч Магсарын Оюунцэцэг, “Мөнхийн гэгээ” ӨЭМТ-ийн ахлах сувилагч Галсандондовын Шижиртуяа нарын нэрийг тодорхойлжээ. Тэргүүлэгчид хэлэлцээд дээрх зургаан хүнийг дэмжин тодорхойлолтыг нь Ерөнхийлөгийн Тамгын газарт илгээхээр болов. [sgmb id="1"]