XVII жарны “Тийн унжлагат” хэмээх шороон нохой жилийн сар шинийн баярт  зориулсан улс, аймгийн алдар цолтой хүчит 96 бөхийн барилдаан “Хангарь” цогцолборт боллоо. Энэ барилдаанд Булган аймгийн Сэлэнгэ сумын уугуул, “Эрдэнэт үйлдвэр”-ийн “Хангарьд” спорт хорооны бөх аймгийн арслан Б.Гантөмөр түрүүлж, “Нью Майнд” группын бөх, улсын начин Д.Амарсайхан үзүүрлэсэн юм. Аймгийн арслан Б.Гантөмөр гал тахиа жил “босоо” байлаа. Тэрбээр “Нутгаа дуурсгана” улс, аймгийн алдар цолтой бөхчүүдийн барилдаан Орхон аймгаа төлөөлөн зодоглож түрүүлсэн. Үүнээс гадна Баян-Өндөр сумын спорт заалны нээлтийн барилдаанд өвдөг шороодолгүй түрүүлж байв.     Бөхийн барилдааныг Орхон аймгийн Засаг дарга Д.Батлут, Засаг даргын орлогч А.Түвшинжаргал, Засаг даргын Дэд бүтэц, хот байгуулалтын асуудал хариуцсан орлогч С.Батжаргал, БТСГ-ын дарга Н.Зулбаатар болон ахмад бөхчүүд үзэж сонирхлоо. Сар шинийн барилдааныг нээж Орхон аймгийн Засаг дарга Д.Батлут үг хэлж, Орхон аймгийн Бурхан шашинтны төв Хутагт ламын Ганданшаддүвлин хийдийн лам хуврагууд ном айлтгаснаар эхэллээ.     Тус барилдаанд аймгийн арслан Б.Уртбаяр, аймгийн арслан Т.Чулуунгэрэл, Аймгийн арслан Д.Хишигдаваа, аймгийн арслан Б.Цэрэндаваа, аймгийн заан Д.Мягмардорж, аймгийн заан Д.Золбаяр, аймгийн заан О.Мөнх-Ирээдүй зэрэг бөхчүүд зодоглосон юм. [sgmb id="1"]