Аймгийн ИТХ-ын Тэргүүлэгчдийн ээлжит дөрөвдүгээр хуралдаанаар “Аймгийн авто замын тээврийн талаар 2018-2021 онд баримтлах бодлого батлах тухай” асуудлыг хэлэлцэж дэмжээд баасан гарагт болох хуралдаанд оруулахаар шийдэв. Аймгийн ЗДТГ-ын Хөрөнгө оруулалт, хөгжлийн бодлогын хэлтсээс авто замын тээврийн талаар 2018-2021 онд баримтлах бодлогыг хэрэгжүүлэхийн тулд “Зам тээврийн хүрээлэн” ТББ-д багагүй хэмжээний мөнгө төлөн “Зөвлөх үйлчилгээ авч” бодлогын баримт бичгийг боловсруулжээ. О.Оюунбат захиралтай дээрх ТББ-ынхан Зөвлөх үйлчилгээнийхээ талаар танилцуулсан байна. Тэдний судалгааны дагуу “Аймгийн авто замын тээврийн талаар 2018-2021 онд баримтлах бодлого” гарч ирснээр аймгийн хэмжээнд “такси үйлчилгээ гурав дахин буурч түүний хэрээр нийтийн тээврийн үйлчилгээний орлого гурав дахин нэмэгдэнэ” хэмээн О.Оюунбат захирал танилцуулав. Гэхдээ “Зам тээврийн хүрээлэн” ТББ-ын хийсэн энэхүү бодлогын баримт бичгийг замаас нь албан тушаалтнууд өөрчилж, ЗДТГ-ын захиалгын ажилд өөрсдийн хувийн ашиг сонирхлыг оруулсан байж болох талаар яриа гарсан. Аймгийн ИТХ-ын Тэргүүлэгчдийн дарга П.Пүрэвлхагва энэ талаар нухацтай тодруулж, бодлогын баримт бичигт дур зоргоорооо хийсэн зарим нэгэн өөрчлөлтийн тухай ИТХ-ын хуралдаан дээр тодруулах болно гэдгээ мэдэгдсэн. Ямар ч байсан аймгийн ИТХ-ын Тэргүүлэгчид “Авто замын тээврийн талаар 2018-2021 онд баримтлах бодлого”-ыг дэмжиж байгаа ч зарим талаар анхаарах асуудал бий гэдгийг санууллаа.[sgmb id="1"]