2016 оны зургаадугаар сард болсон аймгийн ИТХ-ын сонгууль тойрсон маргаан өнөө хэр дуусгавар болоогүй үргэлжилж байгаа. Аймгийн АН-ын гишүүнчлэлтэй нэр бүхий 29 иргэн нэр дэвшигчээр бүртгэхтэй холбоотой маргааны асуудлаар шүүхийн байгууллагад хандсан. Гурван шатны шүүхээс Орхон аймагт дахин сонгууль явуулж нэр бүхий 29 иргэний сонгогдох эрхийг хангахыг аймгийн Сонгуулийн хороонд даалгасан. Улсын дээд шүүхийн шийдвэрийн биелэлтийн талаар аймгийн АН-ын гишүүн, аймгийн АН-аас ИТХ-ын сонгуульд нэр дэвшигч Д.Доржпүрэв, Б.Булганчимэг нар болон тэдний өмгөөлөгчид хэвлэлийнхэнд хандсан юм. Д.Доржпүрэв “Нэр дэвшигчээр бүртгэхтэй холбоотой маргаан шүүхээр шийдэгдсэн. Улсын дээд шүүхээс Орхон аймагт дахин сонгууль явуулах шийдвэр гаргасан. Үүний дагуу Сонгуулийн ерөнхий хорооноос дахин сонгууль явуулах тухай аймгийн Сонгуулийн хороонд 2017 оны аравдугаар сарын 12-нд 348 тоот албан бичиг ирүүлсэн. Үүнийг аймгийн Сонгуулийн хороо, өнөөгийн эрх баригчид биелүүлэхгүй байгаа. Шүүхийн шийдвэрээр Орхон аймгийн ИТХ-ын 1,2,3,4,5,7,8,9,10,11,12,13,14,15,16,17,19,20,21,22 дугаар тойрогт дахин сонгууль явуулах ёстой. Өөрөөр хэлбэл манай аймгийн ИТХ 33 төлөөлөгчтэй. Аймгийн хэмжээнд 20 тойргийн 31 мандат дээр сонгуулах явагдах ёстой. Аймгийн Сонгуулийн хороо, эрх баригчдаас Дээд шүүхийн шийдвэрийг биелүүлэхийг шаардаж байна. Хуулийн өмнө хүн бүхэн тэгш эрхтэй. Дээд шүүхийн шийдвэртэй холбоотойгоор  аймгийн Шүүхийн шийдвэр гүйцэтгэх албанаас бид тодруулга авсан. Шүүхийн шийдвэр гүйцэтгэх албанаас аймгийн Сонгуулийн хорооны дарга Ш.Батдэлгэрт шүүхийн шийдвэрийг хүлээлгэн өгсөн байна. Гэтэл Ш.Батдэлгэр хэвлэл мэдээллээр “шүүхийн шийдвэрийг хүлээн аваагүй” гэж худлаа ярьсан. Ш.Батдэлгэрийн шүүхийн шийдвэрийг хүлээн авсан гарын үсэг бүхий баримтыг шийдвэр гүйцэтгэлийнхэн бидэнд өгсөн. Хоёрдугаарт, “Ш.Батдэлгэр даргатай аймгийн Сонгуулийн хороо татан буугдаагүй” гэсэн албан ёсны бичгийг Сонгуулийн ерөнхий энэ оны гуравдугаар сард аймгийн ИТХ, аймгийн Сонгуулийн хороонд ирүүлсэн байна. Иймээс Ш.Батдэлгэрийг шүүхийн шийдвэрийг биелүүлэхийг шаардаж байна” гэлээ. Нэр бүхий 29 иргэний зүгээс шүүхийн шийдвэрийг биелүүлэхгүй байгаа аймгийн Сонгуулийн хорооны дарга Ш.Батдэлгэр, нарийн бичгийн дарга М.Жанболат нар  болон гишүүдийг нь Зөрчлийн тухай хуулийн дагуу хууль, хяналтын байгууллагад өгч шалгуулна. Улмаар дахин сонгууль явуулахтай холбоотой зардлыг буруутай этгээдүүдээр төлүүлэх тухай хуульд заасны дагуу Ш.Батдэлгэр даргатай, М.Жанболат нарийн бичгийн даргатай аймгийн Сонгуулийн хорооны есөн гишүүнээс гаргуулахыг шаардаж хууль, хяналтын байгууллагад шалгуулна гэдгийг хэвлэлийн хурлаар мэдэгдсэн юм.  [sgmb id="1"]