Говил багийн Орхон аймгийн тэргүүний 2-р цэцэрлэгт “Өвлөх эрдэм” өдөрлөг боллоо. Монгол өв уламжлал, ёс заншлыг дээдлэн үзэл баримтлалаа болгодог хоёрдугаар цэцэрлэгийнхэн аймгийн Боловсрол, соёл, урлагийн газрын төлөөлөл болон цэцэрлэгийн эрхлэгч нарт үйл ажиллагаагаа танилцуулсан юм. Тус цэцэрлэг нь 2012 оноос хойш эцэг эхчүүдийн санаачилгаар зөв монгол хүүхдийг төлөвшүүлэх, ардын ёс заншил өв уламжлалд тулгуурлан сургалтын хөтөлбөрөө хэрэгжүүлэхээр болжээ.  2017-2018 оны сургалтаар хүүхэд багачууд сурсан мэдсэнээ үзүүлж, багш нар сургалтын арга барилаасаа сонирхууллаа. Хоёрдугаар цэцэрлэгт одоогийн байдлаар зургаан бүлгийн 192 хүүхэд хүмүүжиж байна.  Бага, дунд, бэлтгэл бүлэгт хүүхдийн нас сэтгэхүйд тохирсон ардын өв уламжлалыг заадаг. Бэлтгэл бүлгийнхэн даам тоглож, шагайн наадгай, оньсон тоглоомоор тоглодог байна. Хаягдал хөөсөнцрөөр товгор ханан чимэглэл хийжээ Говил багийн хоёрдугаар цэцэрлэгийн арга зүйч Л.Одонцэцэг хаягдмал материалыг ашиглан ханан чимэглэл хийсэн байна. Тэрээр хөөсөнцрөөр товгор ханан чимэглэл бүтээх санааг гаргажээ. Цэцэрлэгийнхээ 40 жилийн ойгоор бүтээсэн түүний 26 бүтээл монгол өв уламжлалыг харуулсан байна. [sgmb id="1"] Үндэсний өв соёлыг цэцэрлэгийн наснаас олгох зорилгоор Орхон аймгийн тэргүүний хоёрдугаар цэцэрлэгийн багш, ажилчид хөдөлмөрлөж байна. Цэцэрлэгийн багш нараас гадна жижүүр ажилтнууд хүүхэд багачуудад  даам, бөхийн дугуйлан орж, хүн бүр хүүхдийн төлөө хичээж ажиллаж байгаа гэдгийг тус цэцэрлэгийн арга зүйч хэлж байсан юм. А.Чимэг