“...Мөнгөн цагаан хүлэг минь дүүлж явна  аа хө Мөнгөн цагаан хүлгээ бариуд дуулж явна аа хө” хэмээн “Нисгэгчийн дуу”-нд гардаг. Монголчууд энэ дууг дуулах, сонсох дуртай. Манай улсын хувьд нисэхийн чиглэлийн мэргэжилтэнг ОХУ, Украйн зэрэг оронд бэлтгэдэг. Тэгвэл эх роондоо тэр тусмаа орон нутагт, Эрдэнэт хотод нисэхийн чиглэлийн мэргэжилтэн бэлтгэдэг болно гэвэл уншигч та итгэх үү. Манай аймгийн “Маргад” дээд сургууль нисэхийн чиглэлийн мэргэжилтэн бэлтгэж эхлэх гэж байна. Үүний хүрээнд өнгөрсөн долоо хоногийн дундуур Эрдэнэт хотын төвд бидний сайн мэдэх АН-2 онгоцыг байршуулжээ. “Маргад” дээд сургууль нисэх онгоцны механик, анхан шатны нисгэгч бэлтгэх зорилгоор дадлагын бааз сууриа бэхжүүлж, дадлагын зориулалтаар ашиглах АН-2 онгоцыг ийнхүү байршуулжээ. "Монгол улсын инженер техникийн зөвлөл"-ийн инженерүүд болон МИАТ компанийн инженер, техникийн ажилтанууд ирж онгоцыг угсарч, асаасан юм. Эрдэнэт хотод 20 гаруй жилийн дараа нисэх онгоцны мотор дуугарч буй энэхүү ёслолын ажилланаанд Орхон аймгийн Засаг даргын орлогч А.Түвшинжаргал тэргүүтэй албаныхан оролцов. АН-2 гэх нэг хөдөлгүүртэй онгоцыг анх ЗХУ-ын Антоновын зохион бүтээх товчоонд 1946 онд зохион бүтээжээ. Манай улсад 1956 оноос хойш нийтдээ 90 гаруй онгоц Иргэний агаарын тээвэрт болон Цэргийн нисэх хүчинд хүлээн авч ой хээрийн түймэр, цас зуд зэрэг байгалийн гамшигтай тэмцэх, үйлдвэрлэлийн ослын хор хөнөөлийг арилгах зэрэгт өргөн ашигласанаар ард иргэд "царцаа ногоон онгоц" хэмээн нэрлэж хэвшсэн. [sgmb id="1"]