Аймгийн Засаг даргын даваа гарагийн шуурхай зөвлөгөөн дээр өмнөх долоо хоногт иргэдээс 7035-3511 утсанд ирүүлсэн гомдлыг хэрхэн барагдуулсан талаарх мэдээллийг орон нутгийн удирдлагууд сонсч, зарим тохиолдолд шаардлагатай нэмэлт арга хэмжээ авдаг. Иргэдийг сонсох төв болон 7035-3511 утсанд эрдэнэтчүүд гомдол, санал хүсэлтээс эхлээд тухайн байгууллага, иргэн, хувь хүнд хандсан талархлаа ч илэрхийлдэг. Долоо хоног бүрийн мэдээллээс харвал эрүүл мэндийн байгууллага, БОЭТ-ийн эмч нарын зан харьцаа, ёс зүйтэй холбоотой гомдол, санал хүсэлт маш их ирдэг. БОЭТ-ийн зүгээс тухайн үед нь иргэдийн гомдолд арга хэмжээ авч хариу өгч энэ тухай мэдээллээ аймгийн Засаг даргын шуурхайд ирүүлдэг ч эмч нарын ёс зүй, зан харьцаатай холбоотой асуудал нэг тийш шийдэгддэггүй.  Гучин есөн хэм хүртэл халуураад ирж байгаа дөрвөн настай хүүхдийг хүртэл ээлж хүлээлцэж байгаа нэрээр хүлээлгэдэг явдлаас эхлээд нэмэлт төлбөр авдаг, авлига нэхдэг ёс зүйгүй үйлдэл БОЭТ-д амь бөхтэй оршсоор байгааг өнөөдрийн аймгийн Засаг даргын шуурхай дээр шүүмжиллээ. Шуурхайг удирдсан аймгийн Засаг даргын орлогч А.Түвшинжаргал “Эмч нарын харьцаа, ёс зүйн талаар энэ долоо хоногт долоон гомдол иржээ. Хүүхдээ машинд мөргүүлсэн иргэнээс 15 мянган төгрөг нэхсэн байна. Мөнгө авах ёсгүй. Хэрвээ мөнгө авсан бол АТГ-т хандвал яасан юм бэ. Танайд ёс зүйн хороо гэж байна уу. Үнэндээ танайд таван эмч л хэл ам таталдаг. Энэ таван хүн 1000 гаруй эмч, эмнэлгийн ажилтны нэр хүндийг гутааж харлуулдаг. Цаашид яах ёстой юм бэ. Энэ таван хүнд ямар арга хэмжээ авах вэ Батсүх дарга аа” хэмээн тодрууллаа. БОЭТ-ийн захирал Б.Батсүх “Манайд Ёс зүйн хороо байгаа. Иргэдээс ирүүлсэн гомдлын дагуу зарим хүнийг Ёс зүйн хороогоор оруулдаг. Ингээд ч нэмэр болохгүй байна. Хувь хүний өөрийнх нь харьцаа хандлагад маш их асуудал байна. Хэдий болтол Ёс зүйн хороогоор орууллаа гээд сууж байх вэ. Хувь хүнтэй нь ярьж, цаашлаад Хөдөлмөрийн гэрээг нь цуцлах тухай ярих цаг болсон. Алийн болгон тэтгэвэрт гарах дөхсөн юм, хөөрхий гээд хараад суух вэ. Энэ тал руу хандахаас өөр арга алга” гэсэн хариулт өглөө. Аймгийн Засаг даргын орлогч А.Түвшинжаргал “Хувь хүнд нь тодорхой арга хэмжээ авах улмаар Хөдөлмөрийн гэрээг нь цуцлах эрх нь танд бий. Таньтай Хөдөлмөрийн гэрээ байгуулсан. Энэ ажлыг та л хийнэ. Алийн болгон БОЭТ-ийн олон зуун ажилтны нэр хүндийг гутааж байгаа нөхдийг хаацайлах юм бэ. Арга хэмжээ авах цаг нь болсон” гэлээ. [sgmb id="1"]